La Südostschweiz ed il Tagblatt rapportan en lur ediziun dals 17 da favrer 2020 davart la rolla da la Cumissiun per giustia e segirezza (CGS) en connex cun las investigaziuns currentas concernent dumondas persunalas e structuralas tar la Dretgira chantunala grischuna. En quest connex vegn tschentada tranter auter la dumonda d'in eventual conflict d'interess dal parsura da la cumissiun. Er vegnan tschentadas dumondas davart il proceder da la cumissiun e davart l'urari – en spezial en vista a las novas elecziuns da la Dretgira chantunala la stad.

Suenter sia sesida constatescha la Cumissiun per giustia e segirezza unanimamain:

1. Il parsura da la CGS, Ilario Bondolfi, giauda la confidenza cumplaina da la cumissiun. Quella sa cumpona dad 11 commembers, che represchentan tut las fracziuns dal Cussegl grond ed uschia er tut ils aspects da la politica da partida. La CGS è in gremi da surveglianza dal parlament che sto ademplir tut sias incumbensas en moda neutrala sco er tenor criteris puramain objectivs e giuridics. I na dat per nagins commembers da la cumissiun, pia er betg per il parsura, in conflict d'interess ed uschia er nagins motivs da recusaziun.
2. La CGS è incumbensada cun la surveglianza da las dretgiras superiuras dal chantun. Ella ademplescha questa incumbensa – gist en reguard a las dumondas che vegnan discutadas actualmain en la publicitad – en ina moda extremamain seriusa ed è interessada da sclerir ils fatgs en moda cumplessiva e speditiva. La surveglianza e la surveglianza suprema da las dretgiras tras la CGS pertutgan sulettamain la gestiun e l'administraziun giudiziala. Tuts dus secturs giogan ina rolla decisiva tar las interrogaziuns currentas da las partidas. La CGS parta dal fatg che quellas vegnian ad esser terminadas fin mez mars 2020.
3. Suenter vegn la CGS a prender las decisiuns correspundentas en il decurs da la primavaira 2020.
4. Per che las elecziuns per la renovaziun totala da la Dretgira chantunala possian vegnir fatgas cun il quità duì e cun la cumpetenza necessaria, ha la CGS dumandà ils 10 da favrer 2020 la Conferenza da las presidentas e dals presidents dal Cussegl grond responsabla da spustar las novas elecziuns vegnintas da la Dretgira chantunala da la sessiun da zercladur sin la sessiun d'avust 2020.
5. L'expertisa ch'è vegnida instradada pervia da l'accumulaziun da pendenzas tar la Dretgira chantunala – e ch'ins ha laschà far dus experts externs – vegn spetgada per il mars 2020. La CGS vegn silsuenter ad instradar immediatamain las mesiras da meglieraziun necessarias.

Infurmaziuns:
Ilario Bondolfi, president da la cumissiun per giustia e segirezza dal cussegl grond, tel. Tel. 081 257 01 83

Gremi: Cumissiun per giustia e segirezza  
Funtauna: rg Cumissiun per giustia e segirezza