Il Cussegl federal ha relaschà il venderdi – en il rom da sia cumpetenza en la Lescha d'epidemias – in'Ordinaziun davart las mesiras per cumbatter il coronavirus. Scumandadas èn tut las occurrenzas cun pli che 1000 persunas. Il chantun Grischun ha precisà la ponderaziun da ristgas ch'è en sia responsabladad per occurrenzas cun main che 1000 persunas e coordinà tala cun la citad da Cuira. Il basegn d'infurmaziun da las vischnancas e dals organisaturs è grond. Las mesiras necessarias ch'il chantun Grischun ha relaschà èn restrictivas, ma ellas vegnan chapidas. Actualmain è il coronavirus vegnì cumprovà tar quatter persunas en il Grischun. Ulteriurs cas da suspect vegnan sclerids.

Las autoritads chantunalas han precisà las directivas concernent la realisaziun u l'annullaziun d'occurrenzas. Uschia èn da princip scumandadas occurrenzas cun main che 1000 persunas, ma cun caracter surregiunal u cun participaziun internaziunala. Las ristgas d'occurrenzas regiunalas pli pitschnas vegnan giuditgadas da cas a cas dals gremis chantunals. Analogamain a la regulaziun da la citad da Cuira vegni recumandà en general da renunziar ad occurrenzas cun pli che 50 persunas.

Dapi venderdi saira sa stgaudan ils cabels da la lingia da telefon dal stab parzial dal Stab directiv chantunal. Il basegn d'infurmaziun da las vischnancas e dals organisaturs è fitg grond. Il formular da contact che sa chatta sin la pagina d'internet dal chantun sa cumprova e vegn duvrà bain.

Pertutgà entira famiglia – ulteriurs cas da suspect vegnan sclerids
En ils conturns dals dus uffants d'ina famiglia taliana, tar la quala il test è stà positiv l'emna passada e che sa chatta en tgira medicala, èn ils tests da las ulteriuras quatter persunas, ch'èn tuttas gia stadas isoladas, er stads positivs. Lur stadi da sanadad è però – tenor las circumstanzas – bun. Tut en tut han ils tests da 76 persunas ch'èn vegnids fatgs fin ussa en il Grischun mussà in resultat negativ en 43 cas, in resultat positiv – sco gia menziunà – en 6 cas e tar 27 cas n'è il resultat anc betg enconuschent.

Cumparegliar la grippa cun il corona è pussaivel mo cun resalvas
En Svizra moran – tenor la media da blers onns – mintga onn var 1500 persunas da la grippa. Il coronavirus è circa tuttina privlus. Tenor il stadi d'enconuschientscha actual vegnan las persunas pertutgadas puspè a guarir suenter 1-2 emnas u a patir da sintoms mo levs.Cuntrari a la grippa na pon las persunas periclitadas spezialmain, pia persunas endeblidas pervia d'ina autra malsogna u persunas pli veglias sco er il persunal da sanadad, betg sa proteger cun ina vaccinaziun. E perquai che nagin n'ha anc fatg tras questa malsogna da las vias respiratoricas nova, na datti er nagina uschènumnada immunitad da gruppa, uschia ch'il virus po sa derasas en moda exponenziala.

Cumprovà la necessitad da las mesiras
In ospital regiunal sco per exempel Schiers cun 40 chombras singulas fiss equipà fitg bain per in'epidemia. Sch'i stuess – da las var 15 000 persunas che vivan en il Partenz – 1 pertschient da la populaziun ir a l'ospital pervia dal coronavirus, fissan quai 150 cas. Las instituziuns da sanadad dal Grischun èn per il mument occupadas fitg bain pervia da la stagiun d'enviern e pervia da la grippa stagiunala, uschia ch'ils ospitals ed ils provediturs da basa han lavur avunda. Per avair a disposiziun avunda plazzas en ils ospitals per las persunas las pli flaivlas da nossa societad, fan las autoritads da sanadad perquai tut per franar u almain per reducir la derasaziun dal coronavirus. Questa metoda ha l'effect il pli grond al cumenzament d'ina epidemia. Cun applitgar las mesiras d'igiena generalas po la populaziun da sia vart gidar da cumbatter tant il coronavirus sco er la grippa stagiunala.

La pagina d'internet vegn actualisada permanentamain
A las vischnancas, als organisaturs ed a las medias stat a disposiziun – ultra da las infurmaziuns actualas – in formular da contact sin la pagina d'internet www.gr.ch/coronavirus. Las autoritads responsablas sa stentan da giuditgar tut las dumondas en moda speditiva. Il basegn d'infurmaziun è actualmain grond. A partir da dumengia vegn il post d'infurmaziun rinforzà supplementarmain, tranter auter cun persunas da la protecziun civila.

Infurmaziuns:
- Peter Peyer, cusseglier guvernativ, tel. 079 629 00 85, e-mail Peter.Peyer@djsg.gr.ch


Gremi: Regenza
Funtauna: rm Chanzlia chantunala