L'Engiadina e las vals dal sid èn actualmain pertutgadas pli fitg da la crisa da corona che las autras regiuns dal Grischun. Pervia da quai èsi fitg impurtant da sa barattar regularmain, da far raits, d'agir en moda solidarica e da realisar las mesiras ordinadas da la Confederaziun en moda cuminaivla e consequenta. Il chantun vegnia a far tut per tut las regiuns per dumagnar la situaziun han empermess ils cussegliers guvernativs Peter Peyer e Marcus Caduff ad ina scuntrada cun represchentants regiunals a Puntraschigna.

Set deputadas e diesch presidents communals da las regiuns Malögia, Bernina ed Engiadina Bassa / Val Müstair èn sa scuntrads mardi, ils 24 da mars 2020, cun ils cussegliers guvernativs Peter Peyer, schef dal Departament da giustia, segirezza e sanadad, e Marcus Caduff, schef dal Departament d'economia publica e fatgs socials, sco er cun Martin Bühler, manader dal Stab directiv chantunal. L'intent da questa scuntrada è stà quel da tractar la situaziun actuala en las differentas regiuns, ma er da sclerir dumondas giuridicas e da discutar problems pratics sco er da tschertgar soluziuns.

In tema principal ha pertutgà ils cunfins controllads en moda pli severa u schizunt serrads per part dal tuttafatg e la regulaziun per ils cunfinaris. Ils responsabels da las vals dal sid han pretendì da laschar vinavant avert ils cunfins. Els han punctuà l'impurtanza dals cunfinaris per ils fatgs da sanadad e per autras branschas. Il medem mument è vegnì drizzà in appel a las interpresas da controllar che la distanza da 2 meters e che la grondezza da gruppas da maximalmain 5 persunas vegnian observadas rigurusamain. Quai na valia betg mo a la plazza da lavur, mabain er per ils viadis dals cunfinaris nà da chasa e puspè enavos.

Sche persunas spezialisadas estras dal sectur medicinal na dastgian in bel di betg pli lavurar en Svizra pervia da motivs da capacitad, vegnin nus a pudair engaschar persunas scoladas ch'èn gia s'annunziadas sin l'appel chantunal.
In ulteriur punct da discussiun èn stads ils giasts en las regiuns da vacanza dal Grischun. Las vischnancas vegnan a stimar – ensemen cun il chantun – il dumber da turistas e turists e trair da quai conclusiuns per il provediment da la sanadad.
La finala han Marcus Caduff e Peter Peyer supplitgà ils represchentants regiunals da betg sa laschar irritar d'infurmaziuns medialas sbagliadas e da las mesiras differentas en ils pajais vischins. Ans tegnain vi dals fatgs, hajan confidenza en noss experts sco er en las decisiuns dal Cussegl federal e faschain valair cuminaivlamain las reglas ordinadas en tutta consequenza. Uschia vegnin nus a pudair franar la derasaziun dal virus ed a returnar pli svelt puspè ad ina vita normala, han ditg ils dus cussegliers guvernativs per finir.

Infurmaziuns

Per ulteriuras infurmaziuns per mauns da la populaziun renviescha il chantun Grischun a la suandanta pagina d'internet: www.gr.ch/coronavirus Per dumondas generalas per telefon stat a disposiziun a la populaziun da lingua tudestga la lingia d'infurmaziun da l'Uffizi federal da sanadad publica: Telefon: +41 58 463 00 00 (mintga di, di e notg) Infurmaziuns per las collavuraturas ed ils collavuraturs da las medias, per il sectur da sanadad, per las vischnancas e per las scolas Dumondas pon vegnir drizzadas er vinavant directamain al post da communicaziun per il coronavirus: Uras da manaschi mail: glindesdi fin dumengia 08.00 – 17.00 Uras da manaschi telefon: glindesdi fin venderdi 08.00 – 19.00 E-mail medias: kfsmedien@amz.gr.ch   E-mail sectur da sanadad: kfsmedical@amz.gr.ch   E-mail vischnancas, scolas & lavur: kfsinfo@amz.gr.ch   Telefon: +41 81 254 16 00