La Regenza ha deliberà il sboz per adattar la Lescha davart la protecziun civila dal chantun Grischun per la consultaziun. Cun la prolungaziun proponida da l'obligaziun da far servetsch da protecziun civila duai il chantun Grischun survegnir il temp necessari per pudair elavurar soluziuns cunvegnentas per la Protecziun civila dal Grischun e las midadas da leschas respectivas.

Ils 20 da december 2019 han las chombras federalas deliberà la revisiun totala da la Lescha federala davart la protecziun da la populaziun e la protecziun civila. La revisiun totala che duai entrar en vigur il 1. da schaner 2021 ha effects considerabels sin il dumber dad appartegnents da la protecziun civila (AdPC). Il dumber dad actualmain tut en tut 2277 AdPC (senza voluntaris) sa reduciss per il 1. da schaner 2021 per 624 AdPC a 1653 AdPC. Per pudair adattar la Protecziun civila dal Grischun a questa nova situaziun e per elavurar las midadas da leschas respectivas propona la Regenza da far diever da la pussaivladad previsa en la Lescha federala davart la protecziun da la populaziun e la protecziun civila revedida da prolungar per in temp limità l'obligaziun da far servetsch da protecziun civila.

Ils documents da consultaziun stattan ussa a disposiziun
La consultaziun dura dals 20 da matg 2020 fin ils 20 da fanadur 2020. Ils documents respectivs pon vegnir consultads sin las paginas d'internet dal chantun u dal Departament da giustia, segirezza e sanadad. Ultra da quai pon els vegnir empustads per telefon (tel. +41 81 257 25 16) tar il departament.

Infurmaziuns:
cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e-mail Peter.Peyer@djsg.gr.ch

Gremi: Regenza
Funtauna: rg Departament da giustia, segirezza e sanadad