Il traject Ospizio Bernina fin Baracon da la via dal Bernina vegn serrà il cumenzament da zercladur durant 10 dis per lavurs da construcziun per augmentar la segirezza.

Sin il traject Ospizio Bernina fin Baracon, tranter kilometer 18,5 e 18,7 maina la via dal Bernina (H29) per lung d'ina paraid-crap stippa cun ina scarpa grippusa d'ina autezza tranter 12 e passa 30 meters da la vart da la muntogna. Il grip è per gronda part plain sfendaglias. Per augmentar la segirezza stradala èn vegnids allontanads fin ussa mintga onn crappa e blocs da crap libers da la paraid-crap. Las persunas responsablas da l'Uffizi da construcziun bassa han ussa decidì da segirar l'entira surfatscha da las parts grippusas.

Mesiras da segirezza
La paraid-crap vegn nettegiada ed ils gronds blocs da crap instabils vegnan sche pussaivel allontanads cun in exchavatur a bratsch lung. Suenter vegn la paraid-crap segirada cun raits d'atschal e cun armadiras da sustegn. Questas mesiras remplazzan da princip las lavurs annualas da nettegiament vi dal grip. A medem temp vegn augmentada la segirezza.

Via serrada
Las mesiras e las lavurs da segirezza han lieu dals 2 fin ils 5 da zercladur 2020 e dals 8 fin ils 12 da zercladur 2020, mintgamai la notg tranter las 22:00 e las 5:00. Durant quel temp è la via dal Bernina serrada per tut il traffic. Durant la serrada pon dentant vegnir utilisadas las suandantas uras da passadi per passar il plazzal: da las 24:00 fin las 00:15 e da las 02:00 fin las 02:15, mintgamai durant 15 minutas. Ordaifer il temp che la via è serrada po il traffic circular mo sin in vial. Sut www.strassen.gr.ch stattan a disposiziun la charta e la glista da plazzals actuala cun indicaziuns detagliadas davart las lavurs e davart ils impediments.

Fotografias agiuntadas:

Via dal Bernina cun francadas gia existentas

Infurmaziuns:
- Reto Knuchel, inschigner chantunal, Uffizi da construcziun bassa, tel. +41 81 257 37 01, e-mail Reto.Knuchel@tba.gr.ch
- Gion Hagmann, schef dal mantegniment da vias, Uffizi da construcziun bassa,  tel. +41 81 257 37 35, e-mail Gion.Hagmann@tba.gr.ch

Gremi: Uffizi da construcziun bassa
Funtauna: rg Uffizi da construcziun bassa