La revisiun parziala fa adattaziuns al dretg federal e realisescha intervenziuns politicas da la PPS e da la PLD. Ultra da quai vul ella mantegnair in'adattaziun a la chareschia er, sch'il curs da chareschia è negativ.

Il legislatur federal ha revedì la taxaziun a la funtauna. Cun la revisiun parziala da la Lescha chantunala da taglia vegn fatga in'adattaziun al dretg federal obligatoric. Las persunas suttamessas a la taglia a la funtauna ch'èn domiciliadas en Svizra e che han entradas bruttas d'almain 120 000 francs, èn suttamessas sco fin ussa a la taxaziun ordinaria posteriura obligatorica. Da nov pon tut las ulteriuras persunas suttamessas la taglia a la funtauna ch'èn domiciliadas en Svizra, dumandar ina taxaziun ordinaria posteriura. Sch'ellas fan quai, survegnan ellas lura ina decleraziun da taglia. En quella ston ellas declerar tut lur entradas sco er tut lur facultad. Persuenter han ellas las medemas pussaivladads da far deducziuns sco las persunas suttamessas a la taglia ordinaria. Las persunas suttamessas a la taglia a la funtauna ch'èn domiciladas a l'exteriur, sco per exempel cunfinarias e cunfinaris, pon medemamain dumandar ina taxaziun ordinaria posteriura. Ma la premissa è quella che almain 90 pertschient da las entradas ch'ellas obtegnan sin l'entir mund, sajan suttamessas a la taglia en Svizra.

Realisaziun d'intervenziuns politicas
Cun sia incumbensa da fracziun vul la PPS dal Grischun pussibilitar d'inoltrar la decleraziun da taglia sin via electronica en il futur er senza suttascripziun. Per cuntanscher quai duai vegnir stgaffida ina basa legala correspundenta.

Sin fundament da l'incumbensa da la fracziun da la PLD dal Grischun ha la Regenza examinà l'autezza da la taxaziun da cumpensaziuns en chapital che provegnan da la prevenziun. Ina cumparegliaziun cun auters chantuns ha mussà ch'il chantun Grischun n'è betg cumpetitiv en quai che reguarda las retratgas pli grondas da chapital da persunas betg maridadas. Perquai propona la Regenza da reducir la tariffa maximala tar las retratgas da chapital pli grondas da questas persunas.

Chareschia negativa
Sche l'index naziunal dals pretschs da consum (INPC) divergescha il fanadur d'in onn chalendar per 3 pertschient u per dapli dal stadi a la fin da december 2005, s'augmentan differentas deducziuns per 3 pertschient u per dapli il proxim onn chalendar. Il fanadur 2019 era il INPC 103,6 pertschient, uschia ch'igl è vegnida fatga in'adattaziun a la chareschia per l'onn fiscal 2020. La fin da matg 2020 era il INPC 102,7 pertschient. Sch'il INPC fiss il fanadur da quest onn anc adina sut 103 pertschient, quai che n'è betg improbabel en vista a la pandemia da COVID-19, na vegnissan betg ademplidas las premissas per l'adattar a la chareschia l'onn 2021. Concretamain vuless quai dir che las deducziuns per uffants e las deducziuns per las premias da las cassas da malsauns vegnissan per exempel reducidas e che la progressiun da la taglia sin las entradas vegniss augmentada. A l'avis da la Regenza na fiss in tal augment da las taglias strusch chapibel, gist areguard la situaziun actuala pervia da la pandemia da COVID-19. Da nov duai pia avair lieu ina gulivaziun da la progressiun fraida er, sche la sava da 3 pertschient ch'è vegnida cuntanschida ina giada, vegn sutpassada.

Il Cussegl grond vegn a tractar il project en la sessiun d'october 2020.

Agiunta:
missiva

Infurmaziuns:
- president da la Regenza dr. Christian Rathgeb, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch
- Toni Hess, Leiter Rechtsdmanader dal Servetsch giuridic tar l'Administraziun da taglia, tel. +41 81 257 33 26, e-mail Toni.Hess@stv.gr.ch

Gremi: Regenza
Funtauna: rg Departament da finanzas e vischnancas