Il chantun Grischun beneventa reglas unitaras sin nivel naziunal. La finamira è quella da franar ils dumbers da cas per evitar ch'il sectur da sanadad, cunzunt il persunal da las chasas da dimora e dals ospitals, vegnia surchargià. Las capacitads da far tests en il chantun Grischun vegnan augmentadas.
Las novas regulaziuns da la Confederaziun han l'intenziun da franar in augment dals dumbers da cas e d'impedir ulteriuras mesiras rigurusas ch'èn drasticas per l'economia, per il turissem sco er per il sport e per la cultura. Cun las novas mesiras duai vegnir cuntanschida ina situaziun epidemiologica stabila fin al cumenzament da la stagiun d'enviern.
Ils concepts da protecziun da las branschas e da las interpresas ston vegnir observads vinavant strictamain. Las experientschas mussan che infecziuns sa laschan evitar grazia a concepts da protecziun, sch'i vegn purtà consequentamain ina mascrina e sche las mesiras da distanza e d'igiena vegnan observadas. La Regenza appellescha a la populaziun da resguardar en ils conturns professiunals e privats consequentamain las mesiras d'igiena e da distanza sco er d'observar l'obligaziun da purtar ina mascrina.
Las instituziuns da furmaziun dal stgalim terziar en il chantun midan puspè per gronda part a l'instrucziun a distanza.
La capacitad da far tests vegn augmentada
En vista als tests svelts d'antigens ch'èn permess a partir da l'emna proxima han ils ospitals augmentà lur capacitads da far tests. Els engrondeschan dus centers da tests existents: in center da tests en il Grischun dal Nord a l'Ospital chantunal dal Grischun ed in center da tests en il Grischun dal sid a l'Ospital da l'Engiadin'ota. Tests pon vegnir fatgs en il chantun Grischun er vinavant en las praticas da medis sco er en tut ils ospitals. La gronda part dals tests en il chantun vegn anc adina fatga en las praticas da medis. Las preparaziuns per pudair far tests svelts d'antigens en las praticas ed en ils ospitals progredeschan.
La Regenza examinescha plinavant, sch'i fiss necessari da prender ulteriuras mesiras, en cas che la situaziun epidemiologica en il chantun daventass anc mendra. Ella prepara la pronunzia da la situaziun speziala tenor la Lescha davart la protecziun da la populaziun. En la situaziun speziala po il Stab directiv chantunal (SDC) coordinar pli intensivamain la collavuraziun tranter las vischnancas e las regiuns. Per exempel pon occurrenzas en las regiuns ed en las vischnancas vegnir restrenschidas anc pli fitg.
Infurmaziuns:
Post da communicaziun per il coronavirus dal chantun Grischun: e‑mail Kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)
Gremi: Uffizi da sanadad
Funtauna: rg Departament da giustia, segirezza e sanadad