La damaun baud dals 25 da november 2020 è in luf vegnì sut las rodas en Surselva. Tranter Mustér e Sedrun è il luf giuven vegnì tschiffà d'in auto e mazzà. L'automobilist participà ha annunzià immediatamain l'accident al guardiaselvaschina cumpetent.

L'animal masculin deriva probablamain dals lufs giuvens da quest onn dal triep da Stagias. Il territori da chatscha da quest triep tanscha dal Pass da l'Alpsu sur Sedrun fin a Mustér e tut la Val Medel. Il luf mazzà vegn ussa transportà al Center per la medischina da peschs e d'animals selvadis a Berna respectivamain al Laboratori da biologia da la conservaziun da l'Universitad da Losanna.

Cumportament midà durant l'enviern
Pervia da la naiv en las regiuns pli autas stoi per il mument pli savens vegnir fatg quint che lufs sa trategnan en la val ed en vischinanza dals abitadis en tschertga da pavel. Observaziuns en questa direcziun stuessan vegnir annunziadas mintgamai al guardiaselvaschina cumpetent.

Infurmaziuns:
Dr. Adrian Arquint, schef da l'Uffizi da chatscha e pestga dal Grischun, tel. +41 81 257 38 92, e‑mail Adrian.Arquint@ajf.gr.ch (ercuntanschibel da las 14.00 fin las 15.00)


Gremi: Uffizi da chatscha e pestga
Quelle: rg Uffizi da chatscha e pestga