La Regenza recumonda al Cussegl grond da refusar l'iniziativa chantunala dal pievel "Per ina chatscha etica che sa cumporta cun la natira". L'iniziativa ha in fundament critic envers la chatscha. Ella sa drizza da princip cunter la chatscha sco instituziun. Effectivamain metta l'iniziativa fundamentalmain en dumonda il sistem da chatscha actual, na cuntanscha però a medem temp betg las atgnas finamiras da la protecziun dals animals.

La Regenza ha deliberà ina missiva cumplementara tar l'iniziativa chantunala dal pievel "Per ina chatscha etica che sa cumporta cun la natira" per mauns dal Cussegl grond. L'iniziativa dal pievel ha la finamira d'obtegnair ina revisiun parziala da la Lescha chantunala da chatscha e vul transfurmar en moda rigurusa numerus puncts da la chatscha actuala. L'onn 2015 aveva il Cussegl grond declerà l'iniziativa per parzialmain nunvalaivla. Ma las instanzas giudizialas, a las qualas las iniziantas ed ils iniziants han appellà, han declerà l'iniziativa sco dal tuttafatg valaivla. Il parlament vegn pia a s'occupar anc ina giada dal project, avant che quel po vegnir suttamess al pievel per la votaziun.

La chatscha grischuna ha in aut standard ecologic
Il num da l'iniziativa signalisescha che la chatscha actuala na sa cumportia ni cun la natira, ni haja in aut standard etic. La Regenza na va betg d'accord cun questa valitaziun. La legislaziun chantunala e la legislaziun federala da chatscha han in aut standard pertutgant ils interess da la protecziun dals animals. La diversitad da las spezias d'animals selvadis e las grondezzas da lur populaziuns, la qualitad dals spazis da viver sco er las pretensiuns dals umans e da la societad sa midan permanentamain en il decurs dal temp. La protecziun da las spezias d'animals selvadis e la permissiun per la chatscha da talas sco er las cundiziuns generalas da l'utilisaziun per la chatscha vegnan perquai controlladas ed adattadas permanentamain. Durant ils ultims onns èn vegnids introducids per exempel in vast scumond da la chatscha cun traplas, l'obligaziun da tir per la chatscha sco er ballas e ballins senza plum, uschia che divers giavischs da l'iniziativa èn gia ademplids. La chatscha grischuna da patenta en sia furma actuala è – er ordaifer il chantun – renconuschida generalmain sco ina sintesa da la biologia da selvaschina, da l'ecologia, da l'economia e da la cultura.

Ils aspects da la protecziun dals animals vegnan resguardads bain gia oz – l'iniziativa na cuntanscha betg sias finamiras
Il coc da l'iniziativa èn – supplementarmain a l'aboliziun da la chatscha d'utschels – l'extensiun da la protecziun dals animals mamma e dals animals giuvens sco er la prolungaziun dals temps da schanetg. Ma l'iniziativa na cuntanscha betg la finamira d'evitar – sco intenziunà – ina chatscha durant ils mais d'enviern sco er ina chatscha dals animals mamma e dals animals giuvens. Anzi, sche l'iniziativa vegniss realisada, avess quai per consequenza ch'ins perdess il sistem da chatscha actual da dus stgalims cun chatscha auta e cun chatscha speziala, e che la chatscha privata stuess vegnir cumplettada da nov cun ina chatscha da chavriels organisada dal stadi. Questa chatscha da chavriels stuess – durant temps bler pli lungs che quels actuals – garantir la regulaziun da la populaziun durant l'enviern. Ultra da quai daventassi necessari d'anticipar sin l'avust il cumenzament da la chatscha auta ed uschia sin il temp da chalur dals animals selvadis. Ord vista da la protecziun dals animals stuess quai vegnir giuditgà sco in ulteriur pegiurament. Ina chatscha durant ils temps betg giavischads tenor l'iniziativa, fiss inevitabla.

Iniziativa critica envers la chatscha
L'iniziativa ha in fundament critic envers la chatscha. Ella vegn sustegnida da la persvasiun che las iniziantas ed ils iniziants preschentan en moda transparenta, ch'els considereschian la chatscha per fallida e ch'els refusian da princip la chatscha privata. Ina chatscha tenor il model aspirà da l'iniziativa chaschunass che l'utilisaziun dal regal da chatscha cun ils animals selvadis sco resursa natirala, ch'è oz plain aventuras e vastamain appreziada e che ha ina furma persistenta, stuess vegnir bandunada e stuess vegnir transferida en ina furma garantida dal stadi, che serviss a cumbatter ils donns dals animals selvadis. Tenor l'iniziativa duain en l'avegnir esser represchentads en moda paritetica protecturas e protecturs dals animals, chatschadras e chatschaders sco er laicas e laics en l'Uffizi da chatscha e pestga sco er en la Cumissiun da chatscha. Las ed ils guardiaselvaschina duessan en il futur far tests d'alcohol en il territori da chatscha ed ultra da quai na duessan uffants fin 12 onns betg pudair vegnir prendids cun sai a chatscha e betg dastgar vegnir motivads en scola d'ir a chatscha.

Effectivamain metta l'iniziativa en dumonda fundamentalmain il sistem actual da la chatscha grischuna da patenta. Ma ella na cuntanscha per part cleramain betg sias atgnas finamiras da protecziun dals animals (protecziun dals animals mamma e dals animals giuvens; paus d'enviern). Per quests motivs recumonda la Regenza al Cussegl grond da refusar l'iniziativa chantunala dal pievel "Per ina chatscha etica che sa cumporta cun la natira".

Agiunta:
missiva

Infurmaziuns: 
cusseglier guvernativ dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e‑mail Mario.Cavigelli@diem.gr.ch

Gremi: Regenza
Funtauna: rg Chanzlia chantunala