En ses quint annual 2020 preschenta il chantun Grischun in surpli dal retgav operativ da 78,8 milliuns francs (onn precedent +115,5 miu.). Ultra d'intginas posiziuns d'expensas cleramain pli bassas cumpareglià cun il preventiv han la distribuziun quadrupla dal gudogn da la Banca naziunala svizra (62 miu.), la dividenda da giubileum da la Banca chantunala grischuna (12,6 miu.) sco er dapli entradas fiscalas contribuì a quest bun resultat. Pervia da la pandemia da COVID-19 è il quint 2020 percunter vegnì engrevgià supplementarmain per 60 milliuns netto. Il resultat total mussa in plus dad 81,9 milliuns (onn precedent +53,6 miu.). Las finanzas chantunalas èn posiziunadas vinavant bain per superar la situaziun actuala cun la pandemia da COVID-19 e per dumagnar sfidas futuras.

Las valurs directivas ed ils indicaturs 2020 (onn precedent en parantesas) mussan il suandant maletg:

• resultat operativ 78,8 milliuns (115,5 miu.)
• resultat total 81,9 milliuns (53,6 miu.)
• entradas fiscalas 836,0 milliuns (806,9 miu.)
• investiziuns bruttas 339,4 milliuns (381,2 miu.)
• investiziuns nettas 200,5 milliuns (227,1 miu.)
• quota statala 14,4% (13,6%)
• grad d'atgna finanziaziun da las investiziuns nettas 135,1% (132,3%)
• agen chapital a libra disposiziun 552,2 milliuns (496,1 miu.)
  

Sutpassaments considerabels dal preventiv e differents retgavs supplementars essenzials
En las posiziuns d'expensas n'èn 20 milliuns dals credits tenor preventiv per ils custs materials e per ils custs da manaschi betg vegnids duvrads. Er las amortisaziuns da la facultad administrativa èn stadas per 24 milliuns sut la summa budgetada, perquai che las investiziuns nettas èn stadas marcantamain sut las aspectativas. Gidà a reducir las expensas per var 20 milliuns han credits tenor preventiv per contribuziuns d'investiziun a terzas persunas che n'èn betg vegnids duvrads. Quels èn vegnids amortisads cumplettamain durant l'onn da gestiun. Tut en tut èn vegnids pajads 82 milliuns damain contribuziuns da gestiun ad instituziuns publicas ed a terzas persunas che previs. Passa la mesadad da quai pertutga credits posteriurs betg exaurids per cumbatter la pandemia da COVID-19, sco per exempel contribuziuns a las perditas d'entradas en il sectur da la sanadad u il program chantunal per cas da direzza.

Da la vart dals retgavs è il bun resultat operativ d'attribuir principalmain a las suandantas posiziuns (cumparegliaziun cun il preventiv / cun l'onn precedent):

• distribuziun supplementara da la Banca naziunala svizra (+46,6 miu. / +30,7 miu.)
• taglias chantunalas pli autas (+42,1 miu. / +29,1 miu.)
• dividenda da giubileum da la Banca chantunala grischuna (+12,6 miu.)
• part chantunala pli auta da la taglia federala directa (+0,8 miu. / +14,6 miu.)

Tar las taglias chantunalas èn las taglias directas da las persunas natiralas (taglias sin las entradas, taglias sin la facultad e taglias a la funtauna sco er taglias sin las expensas da persunas estras) creschidas cleramain cumpareglià cun il preventiv (+29,3 miu. / +5,1%) sco er cun l'onn precedent (+28,9 miu. / +5,0%). Er las taglias directas da las persunas giuridicas (taglias sin il gudogn e sin il chapital) èn cleramain sur il preventiv (+18,1 miu. / +24,9%) e sur l'onn precedent (+6,5 miu. / +7,8%).

La finanziaziun speziala Vias mussa in deficit dad 8,4 milliuns durant l'onn da rapport, senza la contribuziun dals meds publics generals (preventiv -20 miu. tar ina contribuziun da 20,25 miu. or dals meds publics generals). Questa meglieraziun dal resultat da las vias è d'attribuir cunzunt al fatg ch'i èn resultadas pli paucas expensas d'investiziun en consequenza da retardaments da projects. Il dabun da las vias resta sin il maximum legal da 100 milliuns.

Resultat extraordinari praticamain equilibrà
Cun valitar sin il martgà las investiziuns finanzialas tegnidas dal chantun en l'interess politic èn resultads gronds gudogns da revalitaziun da 38,1 milliuns en il resultat extraordinari. Medemamain cuntegnidas en il resultat extraordinari èn las prelevaziuns or da las reservas concernent il tunnel da l'Alvra da la Viafier retica (+0,6 miu.) e concernent las infrastructuras relevantas per il sistem (+4,5 miu.). Tras l'apport da 40 milliuns en la prefinanziaziun dal credit d'impegn per promover la transfurmaziun digitala vegn cuntanschì in resultat extraordinari praticamain equilibrà.

Il surpli dal retgav augmenta l'agen chapital
Il resultat total (3. stgalim) sco summa dal resultat operativ (1. stgalim) e dal resultat extraordinari (2. stgalim) importa 81,9 milliuns. L'agen chapital cumprovà importa 2,6 milliardas suenter la cudeschaziun dal gudogn. Da quai èn 552 milliuns agen chapital a libra disposiziun (onn precedent 496 miu.). Las ulteriuras 2,1 milliardas èn liadas en la facultad administrativa, en investiziuns finanzialas sco er en finanziaziuns spezialas ed en prefinanziaziuns.

Investiziuns nettas pli bassas
Las investiziuns nettas importan 200,5 milliuns per l'onn da gestiun. Ellas sutpassan la valur da l'onn precedent per 26,6 milliuns ed èn cleramain sut las autas investiziuns nettas planisadas da 290,1 milliuns tenor il preventiv (-89,6 miu.). Per ils projects currents da la construcziun auta e bassa sco er per ulteriuras investiziuns materialas èn resultadas expensas da totalmain 146,7 milliuns (onn precedent -47,3 miu.; preventiv -47,4 miu.). La reducziun envers l'onn precedent è d'attribuir a la terminaziun da projects gronds. En il sectur da la construcziun bassa èn retardaments tar la realisaziun dals projects da construcziun il motiv ch'il preventiv è vegnì sutpassà. Cun 156,9 milliuns èn er las atgnas contribuziuns d'investiziun a terzas persunas cleramain sut il preventiv (-29,5 miu.).

Perspectiva
Il preventiv 2021 mussa tut en tut in deficit da 33,7 milliuns. Davart il resultat 2021 na pon anc vegnir fatgas naginas indicaziuns en il context actual da la pandemia da COVID-19. Sch'i fiss necessari che las autoritads stuessan pronunziar ulteriuras restricziuns uffizialas sin donn e cust da l'economia e da la societad pervia dal svilup da la pandemia, pudess quai engrevgiar supplementarmain e massivamain las finanzas chantunalas. Il bun resultat annual 2020 e la basa finanziala solida dal chantun furman in bun fundament per dumagnar finanzialmain questa pandemia. Per ils onns suandants para il rom finanzial da daventar pli e pli stretg. Ina reducziun da las sfidas finanzialas n'è betg en vista.

Il Cussegl grond vegn a tractar il quint annual 2020 en la sessiun da zercladur 2021.

Agiuntas:
- Bilantscha
- Quint economic
- Quint d'investiziun

Infurmaziuns: 
cusseglier guvernativ dr. Christian Rathgeb, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch

Gremi: Departament da finanzas e vischnancas
Funtauna: rg Departament da finanzas e vischnancas