La notg sin dumengia, ils 9 da matg, ha stuì vegnir sajettà in luf en Val S. Pieder. L'animal masculin aveva ina ferma blessura vi d'ina chomma davant.. En il Signuradi ha stuì vegnir sajettà in castur blessà.

Tar il luf sa tracti d'in mastgel gia pli vegl. Quel ha pudì vegnir observà pliras giadas durant las emnas passadas. Grevas blessuras vi da la chomma davant han chaschunà ch'il luf gieva fermamain zop e ch'el era flaivel. Danunder che questas blessuras derivan n'è betg enconuschent. La surveglianza da chatscha che ha sajettà quest luf na po er anc betg dir cun segirezza, tar tge triep ch'el appartegna. Il luf vegn ussa tramess al Center per medischina da peschs e selvaschina FIWI a Berna per ulteriuras analisas. L'analisa genetica vegn fatga dal Laboratoire de Biologie de la Conservation da l'Universitad da Losanna.

Cumbat da revier tranter casturs
En il Signuradi ha la surveglianza da chatscha stuì sajettar in castur. L'animal creschì aveva blessuras che pudessan derivar d'in cumbat da revier cun in auter castur. Il ruider era blessà uschè grevamain ch'el n'aveva nagina schanza da guarir. El vegn ussa examinà a Cuira da l'Uffizi per la segirezza da victualias e per la sanadad d'animals. Pervia da la creschientscha da la populaziun dals casturs vegnan constatads adina pli savens casturs cun blessuras che derivan da cumbats da revier.

Infurmaziuns:
- dr. Adrian Arquint, manader da l'Uffizi da chatscha e pestga dal Grischun, tel. +41 81 257 38 92, e-mail Adrian.Arquint@ajf.gr.ch (infurmaziuns tranter las 15.00 e las 15.30)
- Andrea Baumann, Protecziun dals spazis da viver e da las spezias, tel. +41 81 257 38 92, e-mail Andrea.Baumann@ajf.gr.ch (infurmaziuns tranter las 15.00 e las 16.00)

Gremi: Uffizi da chatscha e pestga
Funtauna: rg Uffizi da chatscha e pestga