A partir d'immediat pon interpresas che han gia inoltrà ina dumonda per agids per cas da direzza e che han gia survegnì ina disposiziun da contribuziun inoltrar al chantun sur in formular online las ulteriuras perditas da la svieuta ch'èn resultadas da la pandemia e ch'ellas han subì durant ils mais avrigl fin zercladur 2021.

Il formular online sco er il fegl d'infurmaziun per dumandar agids per cas da direzza per las perditas da la svieuta ch'èn resultadas da la pandemia durant ils mais avrigl fin zercladur 2021, stat a disposiziun a partir d'immediat sin la pagina d'internet dal Departament d'economia publica e fatgs socials (Mesiras per cas da direzza) Il termin per inoltrar posteriuramain las perditas da la svieuta da l'avrigl fin il zercladur 2021 curra fin ils 15 d'avust 2021.

Proceder per inoltrar posteriuramain las perditas da la svieuta da l'avrigl fin il zercladur 2021
Il formular online vala mo per inoltrar posteriuramain las perditas da la svieuta dals mais avrigl fin zercladur 2021. Quai vul dir che l'interpresa ha gia inoltrà avant ina dumonda ordinaria e ch'ella sto avair ultra da quai il dretg da survegnir agid per cas da direzza, quai che vegn decidì en il rom da la dumonda ordinaria (disposiziun da contribuziun positiva u negativa). Cun la disposiziun da contribuziun positiva vegnan resguardadas – en il rom da la dumonda ordinaria – las perditas da la svieuta fin e cun il mais mars 2021.

Sch'ina interpresa ha subì perditas da la svieuta er anc durant ils mais avrigl, matg e/u zercladur 2021, pon quellas ussa vegnir inoltradas posteriuramain sur il formular online. Las interpresas vegnan supplitgadas d'inoltrar posteriuramain las perditas da la svieuta mo ina giada per tut ils mais pertutgads.

La premissas per inoltrar il formular online e per survegnir in ulteriur sustegn èn pia che l'interpresa

• haja subì – durant ils mais avrigl fin zercladur 2021 – perditas da la svieuta ch'èn resultadas da la pandemia, cumpareglià cun ils mais correspundents dals onns 2018/2019,
• haja inoltrà la dumonda ordinaria per mesiras per cas da direzza (termin: 30 da zercladur 2021) ed haja survegnì ina disposiziun da contribuziun positiva,
• observia il termin per inoltrar il formular online cun las indicaziuns necessarias e cun ils documents basegnaivels (termin: 15 d'avust 2021).

La calculaziun da l'autezza dal sustegn na sa mida betg
L'autezza dals agids per perditas da la svieuta da l'avrigl fin il zercladur 2021 vegn calculada tenor la medema metoda sco en il rom da la dumonda ordinaria. I sto vegnir resguardà ch'i valan las limitas da contribuziun da la Confederaziun. Sche quellas èn gia cuntanschidas, na pon vegnir concedids nagins ulteriurs agids finanzials.

La procedura vala mo per interpresas cun ina svieuta annuala fin 5 milliuns francs
L'inoltraziun posteriura da las perditas da la svieuta sur il formular online per l'avrigl fin il zercladur 2021 vala mo per interpresas cun ina svieuta annuala media fin 5 milliuns francs. Interpresas cun ina svieuta annuala da passa 5 milliuns francs vegnan infurmadas spezialmain areguard il proceder concernent las ulteriuras perditas da la svieuta durant ils mais fin il zercladur 2021.

Survista dals termins:

• inoltraziun da l'emprima dumonda ordinaria: termin: 30 da zercladur 2021
• sche l'emprima dumonda ordinaria è vegnida inoltrada: inoltraziun posteriura da las perditas da la svieuta da l'avrigl fin il zercladur 2021: termin: 15 d'avust 2021

Infurmaziuns:
Bruno Maranta, secretari dal Departament d'economia publica e fatgs socials, tel. +41 81 257 23 11, e-mail Bruno.Maranta@dvs.gr.ch

Gremi: Departament d'economia publica e fatgs socials
Funtauna: rg Departament d'economia publica e fatgs socials