En differentas regiuns dal chantun Grischun èn ils donns da selvaschina gronds ed èn s'augmentads ils ultims onns. Cun la strategia concernent il «Spazi da viver guaud-selvaschina 2021» fixescha la Regenza ussa, co che questa situaziun duai vegnir meglierada. En etappas da 5 onns duai il stadi dal guaud sa meglierar pass per pass fin l'onn 2035, e la regiuvinaziun natirala dal guaud duai puspè daventar pussaivla.

In guaud da protecziun saun e bain structurà garantescha segirezza duraivla a la populaziun grischuna. Quest guaud è a medem temp er il spazi da viver da blers animals selvadis che laschan natiralmain enavos fastizs. En differents lieus dal Grischun chaschunan quests fastizs donns excessivs en il guaud. Per schliar quest conflict ha la Regenza grischuna definì 10 finamiras e tut en tut 40 mesiras.

Proceder en etappas
En in emprim pass duain tschertas spezias da bostgs da feglia che surpiglian ina rolla pli e pli impurtanta er en connex cun la midada dal clima, pudair sa regiuvinar en in dumber suffizient. En in segund pass duai er pudair crescher l'aviez. Il pli tard l'onn 2035 na duain – en in terz pass – tut las spezias da bostgs existentas betg pli vegnir influenzadas decisivamain tras la selvaschina. Per quest intent ston vegnir realisadas mesiras forestalas e mesiras da chatscha sco er ulteriuras mesiras che reduceschan en spezial il disturbi dal spazi da viver.

Reducziun dals effectivs da selvaschina e sustegn forestal
Sche la regiuvinaziun dal guaud vegn franada u impedida, manca la generaziun giuvna impurtanta en il guaud futur. Las funcziuns dal guaud, en spezial la funcziun da protecziun, n'èn betg pli garantidas a vista mesauna fin a lunga vista. Per quest intent duai il guaud per gronda part sa regiuvinar sin via natirala e cun tut las spezias existentas. Là nua che quai n'è actualmain betg pussaivel pervia da la ferma influenza da la selvaschina, sto vegnir intensivada la chatscha en il guaud e sto vegnir reducì l'effectiv da selvaschina.

La tgira dal guaud è da gronda impurtanza er per la selvaschina. La tgira dal guaud ch'è vegnida fatga en moda intensiva durant ils onns passads, che garantescha in spazi da viver favuraivel per la selvaschina e che procura uschia er per ina meglra distribuziun dals animals selvadis, sto cuntinuar. Quai vegn fatg tranter auter tras in tractament forestal dal guaud da protecziun e cun promover la biodiversitad en il guaud.

Proposta d'ina soluziun integrala
Supplementarmain a las mesiras da chatscha ed a las mesiras forestalas èn necessaris ulteriurs meds impurtants per meglierar la situaziun guaud-selvaschina. Disturbis dal spazi da viver dals animals selvadis ston vegnir reducids sistematicamain. Durant l'enviern pon ins impedir uschia che la selvaschina sa concentreschia e sa trategnia en ils guauds problematics e ch'ella consumeschia blera energia e chaschunia uschia anc dapli donns. Durant la stad èn impurtants spazis da viver cun paucs disturbis per ina distribuziun uschè buna sco pussaivel dals animals er en la cuntrada senza guaud ed els impedeschan pia concentraziuns en guauds spess. La situaziun na po betg vegnir meglierada sulettamain tras la chatscha e tras la cultivaziun dal guaud. Tut las gruppas en mira ston vegnir sensibilisadas per il process da soluziun e ston esser prontas da realisar mesiras e da sa sustegnair vicendaivlamain. Las gruppas d'interess las pli impurtantas èn ils chatschaders, las vischnancas grischunas sco proprietarias da guaud las pli impurtantas, il turissem e l'agricultura.

Rapports davart il guaud e davart la selvaschina fixeschan mesiras
L'instrument da realisaziun il pli impurtant èn ils rapports davart il guaud e davart la selvaschina. En enclegientscha cun la planisaziun da la chatscha e cun la planisaziun dal guaud descrivan e fixeschan els las mesiras concretas. En ils rapports davart il guaud e davart la selvaschina vegn er controllada l'efficacitad da las mesiras realisadas.

Agiunta:

Strategia concernent il spazi da viver guaud-selvaschina 2021

Fotografia agiuntada:

Infurmaziuns:

- president da la Regenza dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01 (cuntanschibel per telefon suenter las 13.00), e‑mail Mario.Cavigelli@diem.gr.ch

- Urban Maissen, selvicultur chantunal, Uffizi da guaud e privels da la natira, tel. +41 79 475 52 11 (cuntanschibel per telefon suenter las 13.00), e‑mail Urban.Maissen@awn.gr.ch

- Adrian Arquint, manader da l'Uffizi da chatscha e pestga, tel. +41 81 257 38 91 (cuntanschibel per telefon tranter las 13.00 e las 14.00), e‑mail Adrian.Arquint@ajf.gr.ch

Cumpetenza: Departament d'infrastructura, energia e mobilitad