L'october 2021 ha il Departament da giustia, segirezza e sanadad fatg per l'emprima giada in'enquista anonima da tut sias collavuraturas e ses collavuraturs. Cun ina quota da respostas dad 83 pertschient è la participaziun stada fitg gronda. La gronda part da las collavuraturas e dals collavuraturs valitescha la cuntentientscha a la lavur sco auta. Allegraivla è er la gronda prontezza da s'engaschar. L'enquista ha gì la finamira d'eruir potenzials d'optimaziun e da meglieraziun. Tals sa mussan cunzunt tar la concepziun dal temp da lavur, tar la communicaziun interna entaifer ils uffizis sco er en il sectur da las pussaivladads da cooperaziun da las collavuraturas e dals collavuraturs. Quests champs tematics vegnan ussa prendids per mauns activamain.
Enquista anonima da las collavuraturas e dals collavuraturs sco schanza per meglieraziuns
L'october 2021 ha il Departament da giustia, segirezza e sanadad (DGSS) interrogà tut sias 1142 collavuraturas e collavuraturs en furma anonima davart lur cuntentientscha a la lavur. Quai cun la finamira da survegnir resuns per augmentar la cuntentientscha da las collavuraturas e dals collavuraturs a la lavur ed uschia er per augmentar la qualitad da la lavur per la populaziun. L'enquista è vegnida realisada da la firma Empiricon, ch'è spezialisada en quest sectur. 83 pertschient da las collavuraturas e dals collavuraturs èn sa participads a l'enquista. Questa quota da respostas è ordvart auta e sa chatta sur la media d'enquistas cumparegliablas en administraziuns chantunalas u en l'economia privata. Ensemen cun ils questiunaris emplenids èn er vegnids inoltrads var 1300 commentaris. «Quai mussa ch'er las collavuraturas ed ils collavuraturs fan activamain ponderaziuns e sa participeschan – per part er cun propostas concretas – ad in process d'optimaziun», s'allegra il schef dal departament Peter Peyer. En il fratemp ha Empiricon evaluà detagliadamain las datas ed ha uschia stgaffì ina basa per optimaziuns.
En general gronda cuntentientscha a la lavur e gronda prontezza da s'engaschar
Fatgs fitg allegraivels èn il vast consentiment a la prontezza da s'engaschar sco er il sentiment d'attaschadadad al departament ed al chantun sco patrun. Cun 70 da 100 puncts è la cuntentientscha a la lavur tut en tut auta, cun 81 da 100 puncts è la prontezza da s'engaschar cumplainamain a la lavur schizunt fitg gronda. Independentamain da la vegliadetgna u dals onns da servetsch èn questas valurs relativamain unitaras. «Nus ans legrain enormamain che l'attaschadadad al departament è vegnida valitada cun 73 puncts e ch'er il plaschair da la lavur ha survegnì in'auta valitaziun. Quai èn premissas grondiusas per prender per mauns er sfidas futuras cun in team ferm», ha ditg il cusseglier guvernativ Peter Peyer.
Identifitgà il temp da lavur, la communicaziun interna e las pussaivladads da cooperaziun sco champs d'acziun
Las respostas mussan cleramain che la concepziun dal temp da lavur è in punct principal, cun il qual la cuntentientscha a la lavur po vegnir meglierada. Cunzunt la cumpatibilitad da la vita professiunala cun la vita privata è pli difficila en lieus cun in temp da lavur irregular. L'evaluaziun ha er purtà enconuschientschas impurtantas davart las direcziuns dals uffizis. Là vesan las collavuraturas ed ils collavuraturs in potenzial da meglieraziun oravant tut en la communicaziun interna, per exempel tar la suandabladad da decisiuns. In ulteriur tema pertutga las pussaivladads da las collavuraturas e dals collavuraturs da cooperar a la plazza da lavur. Ils resultats da l'enquista mussan che var in quart da las collavuraturas e dals collavuraturs vulessan integrar er atgnas ideas a la plazza da lavur.
Iniziar in process d'optimaziun
«Tras l'enquista e tras ils resultats ch'èn ussa avant maun avain nus in fundament prezius ed ina basa da savida che nus pudain sviluppar vinavant. Grazia a l'evaluaziun possedain nus in instrument directiv per instradar optimaziuns», ha ditg Peter Peyer. «Ussa èsi chaussa da tut ils caders da profitar da la schanza e d'iniziar mesiras correspundentas per meglierar sistematicamain las cundiziuns da lavur, per uschia augmentar vinavant la qualitad da la lavur sur la cuntentientscha da las collavuraturas e dals collavuraturs», ha cuntinuà il schef dal departament. Responsabels per realisar las mesiras èn ils uffizis. En quest reguard vegnan els accumpagnads stretgamain da la direcziun dal departament. Tenor il cusseglier guvernativ Peter Peyer n'èsi betg la finamira d'instradar uschè bleras mesiras sco pussaivel, mabain da daventar activs là, nua che l'effect è il pli grond. Las mesiras duain vegnir lantschadas il cumenzament da l'onn 2022. Ina proxima enquista da las collavuraturas e dals collavuraturs è previsa l'onn 2023.
Agiunta:
Fegl d'infurmaziun Empiricon
Infurmaziuns:
Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel per telefon fin las 13.00), e-mail Peter.Peyer@djsg.gr.ch
Responsabladad: Departament da giustia, segirezza e sanadad