La Regenza abolescha las mesiras chantunalas per franar la pandemia: A partir da damaun, ils 10 da favrer 2022, scroda l'obligatori da purtar mascrinas en la scola populara. A partir da venderdi, ils 11 da favrer vegnan ultra da quai terminads ils tests en ils manaschis ed en las scolas, cun excepziun da quels en las instituziuns da sanadad e da tgira. La Regenza reagescha cun quai sin la situaziun pandemica meglierada e sin la situaziun en ils ospitals che sa calma. La structura directiva chantunala vegn adattada ed orientada da nov.

Malgrà auts dumbers d'infecziun tras la varianta Omicron n'hai betg dà ina surchargia dals ospitals e l'occupaziun da las staziuns da tgira intensiva è sa reducida vinavant. Quai incitescha la Regenza d'abolir las mesiras chantunalas cunter la pandemia. Il motiv per la situaziun pli calma èn probablamain la gronda immunitad da la populaziun tras la vaccinaziun e tras infecziuns precedentas. Ultra da quai chaschuna Omicron main savens decurs grevs che las variantas dal virus pli veglias.

Enavos tar las veglias libertads
La Regenza è conscienta, che la superaziun da la pandemia ha pretendì bler da la populaziun, da l'economia e da la societad. Grazia ad ina gronda atgna responsabladad e grazia ad in cumportament disciplinà èsi reussì d'evitar ina surchargia da las instituziuns da sanadad ed il funcziunament dal provediment da la sanadad ha pudì vegnir garantì da tut temp. Areguard il svilup actual da la situaziun pon ussa vegnir abolidas bleras mesiras. La vaccinaziun e las reglas d'igiena e da cumportament vegnan dentant er vinavant recumandadas sco protecziun cunter ina infecziun. Ultra da quai èsi impurtant che las persunas cun sintoms sa laschian testar u ch'ellas giajan en isolaziun.

Aboliziun da l'obligatori da purtar mascrinas en las scolas popularas
L'obligatori da purtar mascrinas per las scolaras ed ils scolars da las scolas popularas e privatas vegn abolì a partir da gievgia, ils 10 da favrer 2022, a las 00.00. Da purtar voluntarmain ina mascrina è vinavant pussaivel. Per tut las autras persunas vala l'obligatori da purtar mascrinas en ils locals interns sin ils areals da las scolas popularas. L'obligatori da purtar mascrinas per il stgalim secundar II vala fin ch'il Cussegl federal abolescha quel.

Ils tests en ils manaschis ed en las scolas vegnan terminads
La varianta Omicron ha influenzà en moda decisiva la strategia da test. D'ina vart perquai che las chadainas d'infecziun na pon betg pli vegnir interruttas efficaziamain e perquai che las capacitads dals labors èn vinavant limitadas e da l'autra vart perquai ch'il svilup da la situaziun fa buna speranza, vegnan ils tests en las scolas ed en ils manaschis ordaifer ils secturs da sanadad e da tgira terminads a partir da venderdi saira, ils 11 da favrer 2002.

Ils tests en ils manaschis vegnan cuntinuads fin la fin da favrer en ils ospitals, en las clinicas, tar las purschidas da la tgira ed assistenza staziunara da pazientas e pazients da lunga durada e da persunas attempadas, tar ils servetschs da la tgira ed assistenza a chasa (Spitex), en las praticas da medias e medis, en las praticas da dentistas e dentists, en las praticas da fisioterapia, en las apotecas, en las chasas da dimora per persunas cun impediments, en las chasas da dimora per uffants e per giuvenils (cun excepziun da las chasas da dimora en il sectur da la furmaziun fundamentala professiunala, da las scolas medias sco er dal stgalim terziar), en las canortas d'uffants ed en ils stabiliments giudizials. A partir dal cumenzament da mars valan las recumandaziuns da l'Uffizi federal da sanadad publica.

Organisaziun coordinada curunada da success
La pandemia dal coronavirus ha midà la vita durant ils ultims dus onns e mess a la prova las ideas da normalitad, da vita publica e da convivenza sociala. Per proteger la sanadad e l'economia ha la Regenza – en il rom da la superaziun da la pandemia – deliberà 190 conclus en connex cun il coronavirus. Per l'emprima giada en l'istorgia ha la Regenza installà il Stab directiv chantunal (SDC) per ina perioda pli lunga.

Durant dus onns è il SDC stà activ per prevegnir e per superar la pandemia u ha sustegnì l'Uffizi da sanadad. Il chantun è sa decidì per in'organisaziun coordinada che ha integrà las instituziuns dal sectur da sanadad, da l'administraziun, da las vischnancas, da las associaziuns, da las scolas e da la scienza e che ha pudì vegnir adattada cuntinuadamain als basegns pretendids. Ultra da manar in post da communicaziun central per la populaziun e per ils manaschis dal chantun sco er per las medias, èsi reussì a l'organisaziun coordinada da sviluppar concepts da protecziun innovativs. Las mesiras che quels han cuntegnì, èn per part vegnidas surpigliadas en l'entira Svizra.

La superaziun da la crisa vegn puspè transfurmada en structuras regularas
Grazia al svilup positiv po l'ulteriura superaziun da la pandemia dal coronavirus ussa puspè avair lieu en las structuras regularas. Cun l'elavuraziun posteriura è vinavant incumbensà l'Uffizi da militar e da protecziun civila. Il tractament a lunga vista dal coronavirus e las planisaziuns da la prevenziun vegnan ussa fatgas sut la direcziun da l'Uffizi da sanadad.

Il contact tracing, il Post da communicaziun central per il coronavirus sco er la corona-hotline (tel. +41 81 257 44 44) restan vinavant en funcziun.

Agiunta:

Infurmaziuns:

Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias)

Responsabladad: Regenza