La Regenza prenda posiziun davart duas revisiuns parzialas da l'Ordinaziun davart ils servetschs da telecommunicaziun dal Departament federal per ambient, traffic, energia e communicaziun. Da princip beneventa ella las adattaziuns e las finamiras planisadas. Tar las disposiziuns dal provediment da basa sco er tar las disposiziuns davart la segirezza d'infurmaziuns sco er da las infrastructuras e dals servetschs da telecommunicaziun ha ella dentant anc in pèr propostas.

En cas da l'adattaziun da las disposiziuns davart il provediment da basa beneventa la Regenza l'engrondiment planisà dal provediment da basa existent. Ella propona dentant da definir e d'avair en mira ina purschida da basa d'almain 80/80 (down-/upload) enstagl da sco planisà mo 80/8 megabits per secunda. Pervia dal svilup actual da la dumonda è la Regenza schizunt da l'avis che la sveltezza da 100/100 megabits per secunda saja la purschida da basa endretga. La limita maximala dal pretsch duai vegnir fixada sin 45 francs per mais per il servetsch dad 80/80 megabits per secunda. E per la realisaziun dal servetsch 80/80 megabits per secunda en zonas da construcziun duai vegnir determinà in termin concret da tschintg onns. Plinavant vuless la Regenza ch'ils custs da l'access vegnian preschentads en moda transparenta là, nua ch'ils custs per furnir il nov servetsch dal provediment da basa vegnan designads sco nuncommensurads resp. memia auts. Uschia duai esser pussaivel da chattar soluziuns cuminaivlas per cuvrir stretgas finanzialas.

Er tar las disposiziuns davart la segirezza da las infurmaziuns sco er da las infrastructuras e dals servetschs da telecommunicaziun propona la Regenza ina midada. Tenor il sboz da l'ordinaziun ston las purschidras ed ils purschiders da servetschs da telecommunicaziun annunziar immediatamain a la centrala naziunala d'alarm ils disturbis en il manaschi da lur implants e da lur servetschs che pertutgan potenzialmain almain 30 000 clientas e clients. La Regenza dumonda percunter in'obligaziun d'annunziar in disturbi, sche almain 1000 clientas e clients u ina vischnanca resp. ina fracziun èn pertutgads potenzialmain e sch'il disturbi dura pli ditg che 15 minutas. Ina interrupziun resp. in disturbi po avair consequenzas fatalas, sch'i sto vegnir fatg in clom d'urgenza (numer d'urgenza 117/118/144) e sche quai n'è betg pussaivel. Per exempel, sch'i dat in disturbi en il manaschi dals indrizs e dals servetschs da telecommunicaziun en la vischnanca d'Alvra cun la bova da Brinzauls sin il territori da la fracziun da Brinzauls (100 abitantas ed abitants), na pon en cas d'in eveniment betg pli vegnir communitgadas infurmaziuns a la populaziun, quai che sto vegnir evità.

Link: Consultaziuns dal Departament federal per ambient, traffic, energia e communicaziun

En il rom da la Nova politica regiunala da la Confederaziun (NPR) conceda la Regenza ina contribuziun chantunala en l'autezza da var 1,86 milliuns francs a la Cassons SA per il project «Construcziun da l'access a l'Arena tectonica Sardona, Flem». La contribuziun vegn concedida en connex cun in emprest NPR dad 8 milliuns francs.

L'access al Patrimoni mundial da la UNESCO Arena tectonica Sardona duai vegnir realisà cun la construcziun d'ina telecabina da diesch, in uschenumnà rope taxi che cursescha en moda autonoma e ch'è ina innovaziun mundiala. Cun la construcziun da questa telecabina da diesch cun tschintg secziuns vegnan remplazzadas trais pendicularas existentas tras in sistem innovativ da teleferica. Qua tras vegn la purschida da basa en il territori principal da skis a Flem meglierada considerablamain. La nova pendiculara vegn er concepida per il giast da stad – en spezial per render accessibel il Patrimoni mundial da la UNESCO Arena tectonica Sardona. Uschia vegn er prestada ina contribuziun impurtanta areguard la creaziun da purschidas turisticas cumpetitivas. Tras il princip da rope taxi, pia in viadi sin dumonda e nagin transport da cabinas vidas, pon vegnir reducids tant il consum d'energia sco er l'isada da las parts. Ils custs d'investiziun da l'entir project importan circa 79 milliuns francs.

©Cassons SA

La Regenza ha approvà il project «Protecziun cunter crudada da crappa Gruobawald» da la vischnanca da Claustra. En il territori Gruobawald hai adina puspè dà crudadas da crappa e da blocca. Ils rempars da protecziun existents èn per part en in nausch stadi. Grazia a la funcziun da protecziun dal guaud han pudì vegnir impedids numerus eveniments. Perquai che la regiuvinaziun dal guaud manca, è ussa dentant periclità l'effect da protecziun persistent dal guaud. La finamira dal project qua avant maun è quella da garantir la protecziun dal territori d'abitadi da la vischnanca da Claustra, da la lingia da la Viafier retica sco er da la via chantunala e naziunala. Latiers duai il territori vegnir segirà cun agid da raits sco er cun rempars cunter crudadas da crappa. Il project vegn realisà en trais etappas da construcziun e duai vegnir terminà l'onn 2024. Il chantun sa participescha cun ina contribuziun da maximalmain 2,35 milliuns francs als custs budgetads da 4,6 milliuns francs.