La Regenza ha approvà la revisiun parziala da la planisaziun locala da la vischnanca da Tavau concernent la separaziun da las sendas da viandar e da las vias da bike Jakobshorn – Sertig – Rinerhorn. La vischnanca da Tavau aveva concludì questa revisiun il 1. da fanadur 2021. L'approvaziun vegn dentant concedida sut la cundiziun che la senda existenta en la zona da protecziun al Trischtelmeder vegnia duvrada cuminaivlamain da las viandantas e dals viandants sco er da las ciclistas e dals ciclists da muntogna. Il traject che duai vegnir separà maina dal Jakobshorn tras la Val Sertig en il territori dal Jatzmeder (Rinerhorn) e vinavant en direcziun da Monstein e da Filisur. Fin l'onn 2014 era quest traject pauc enconuschent tar las ciclistas ed ils ciclists da muntogna.

Lura è el vegnì distinguì da l'Associaziun internaziunala da mountainbike sco «IMBA Epic Trail». Questa distincziun ha gì per consequenza ch'il traject ha survegnì blera publicitad ed ina gronda impurtanza en la scena da mountainbike. Correspundentamain è il dumber da ciclistas e ciclists da muntogna che curseschan sin l'uschenumnà epic trail creschì fermamain ils ultims onns. L'epic trail maina dentant sin ina senda da viandar existenta ch'è daventada fitg populara ils ultims onns er tar las viandantas ed ils viandants. La coexistenza tranter viandantas e viandants e ciclistas e ciclists da muntogna sin la medema senda – che ha ina ladezza media dad 80 centimeters – arriva adina puspè a ses cunfins. Quai chaschuna conflicts tranter las duas gruppas d'utilisaders. Per pussibilitar a questas duas gruppas er en l'avegnir ina bella aventura cumplessiva senza conflicts, èsi planisà da separar ils trassés per las viandantas ed ils viandants e per las ciclistas ed ils ciclists da muntogna sin l'entir traject pertutgà.

Survista da la separaziun da las sendas da viandar e da las vias da bike

La Regenza ha concedì ina contribuziun chantunala da maximalmain 750 000 francs a la Viafier retica SA per il project da protecziun cunter crudada da crappa «Leidboden» a Tavau.

La lingia da la Viafier retica da Tavau a Filisur traversa – sin ina lunghezza da var 10 kilometers – la Zügenschlucht tranter Tavau Monstein e Filisur. Sin quest traject sa chattan ils rempars temporars cunter crudada da crappa Wiesen e Leidboden. Els protegian la lingia da viafier cunter glera e cunter crappa che rodla oragiu sco er cunter singuls blocs che sa distatgan adina puspè da las zonas d'erosiun fitg stippas. Durant ils ultims onns èn questas crudadas daventadas in problem per il mantegniment. Las svidadas regularas dals spazis da tschiffada memia pitschens chaschuna blera lavur e gronds custs en quest territori isolà. In access sur ina via n'exista betg. Las maschinas ston vegnir transportadas al lieu cun chars da viafier, per ch'il material d'emplenida crudà possia vegnir chargià si e lura manà ad ina deponia. Davent da la fin da l'atun fin al cumenzament da la stad impedescha la naiv in access cun maschinas. Plinavant è il rempar Leidboden en in nausch stadi. Suenter pliras crudadas n'ademplescha el betg pli l'effect da protecziun pretendì. Igl exista in deficit da segirezza. Il project vegn realisà en duas etappas da construcziun e duai vegnir terminà l'onn 2023.

La Regenza ha approvà il project «Reparaziun d'averturas e prevenziun cunter incendis da guaud 2022», in project collectiv da differentas vischnancas. Per quest intent ha ella concedì ina contribuziun chantunala da circa 10,2 milliuns francs.

Il project cumpiglia la reparaziun da vias da guaud e da vias da maschinas d'ina lunghezza totala da 68,4 kilometers. Questas vias èn repartidas sin 59 objects singuls. Tras quai vegn meglierada l'avertura da circa 9200 hectaras guauds da protecziun e da circa 3500 hectaras ulteriurs guauds. Plinavant cumpiglia quest project collectiv l'acquisiziun da material da stizzar fieu per las 12 basas da pumpiers regiunalas per incendis da guaud.

La Regenza declera la situaziun speziala en connex cun il coronavirus per terminada sin l'entir territori chantunal. Resguardond ils dumbers da cas mumentans po actualmain vegnir garantì in provediment suffizient da la sanadad, uschia ch'igl è inditgà da terminar la situaziun speziala er en il chantun Grischun.

Cun il conclus dals 30 da mars 2022 ha il Cussegl federal abolì las ultimas mesiras da l'Ordinaziun davart COVID-19 situaziun speziala per il 1. d'avrigl 2022. Uschia ha lieu il return a la situaziun normala, ed ils chantuns han ussa puspè la responsabladad principala per las mesiras per proteger la populaziun.

La Regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia, ils 15 da matg 2022:

• Midada dal 1. d'october 2021 da la Lescha federala davart la producziun e la cultura da films (Lescha da films, LFi) (Fegl uffizial federal 2021 2326);
• Midada dal 1. d'october 2021 da la Lescha federala davart la transplantaziun d'organs, da tessids e da cellas (Lescha da transplantaziun) (Fegl uffizial federal 2021 2328);
• Conclus federal dal 1. d'october 2021 davart l'approvaziun e la realisaziun dal barat da notas tranter la Svizra e la UE concernent la surpigliada da l'Ordinaziun (UE) 2019/1896 davart la Guardia europeica da cunfin e da costa e davart l'aboliziun da las Ordinaziuns (UE) nr. 1052/2013 ed (UE) 2016/1624 (svilup da l'acquist da Schengen) (Fegl uffizial federal 2021 2333).

Sin plaun chantunal n'èn previs nagins projects da votaziun per ils 15 da matg 2022.