La Scola auta spezialisada dal Grischun è creschida cuntinuadamain durant ils ultims onns. Cunquai che la Scola auta spezialisada è repartida sin tschintg lieus, na po ella betg pli vegnir manada en moda effizienta. Cun in nov edifizi persistent duain vegnir stgaffidas en moda concentrada – a la Pulvermühle a Cuira – infrastructuras ch'èn degnas d'ina scola auta e che permettan da studegiar e da perscrutar en moda prospectiva. La Regenza ha deliberà per mauns dal Cussegl grond la missiva da construcziun correspundenta che cuntegna ina investiziun totala da 178 milliuns francs.
Ord vista da la furmaziun, da la perscrutaziun e da la politica d'innovaziun è la realisaziun d'in Center da scola auta spezialisada da gronda impurtanza per il chantun Grischun. La mancanza da persunas spezialisadas, particularmain en las disciplinas tecnicas, engrevgescha a bleras interpresas grischunas da far las expansiuns necessarias ed il svilup giavischà. En quest ambient economic pretensius è la Scola auta spezialisada dal Grischun (SASGR) in'actura impurtanta per scolar e per promover glieud giuvna ed a medem temp per rinforzar la cumpetitivitad da l'economia publica dal Grischun.
Ina scola auta spezialisada cun fermas ragischs en la regiun, gida a garantir ina scolaziun e perscrutaziun attractiva e d'auta qualitad. Ella po promover l'immigraziun da talents e da persunas spezialisadas en il chantun e reducir l'emigraziun da persunas spezialisadas sco er d'absolventas e d'absolvents da las scolas autas. Tras il nov Center da scola auta spezialisada vegn il Grischun rinforzà e fatg visibel commensuradamain er ordaifer ils cunfins chantunals sco lieu da furmaziun e da scienza che stat en l'interess da la glieud giuvna e da l'economia. La SASGR è dapi il 1. da schaner 2020 l'otgavla scola auta spezialisada da dretg public da la Svizra. Ses lieu principal sa chatta oz a la Pulvermühlestrasse 57.
Concentraziun da lieus da la scola auta spezialisada
Durant ils onns passads èn ils dumbers da studentas e students (2010: 988 studentas e students, 2021: 1972 studentas e students) ed il volumen da perscrutaziun (2010: 3,2 miu. francs, 2021: 11,3 miu. francs) s'augmentads cuntinuadamain. Per tegnair pass cun quest svilup ha la SASGR adina puspè stuì prender en locaziun novas localitads. La scola auta spezialisada è pia repartida oz sin tschintg lieus en nov edifizis entaifer la citad da Cuira. Las surfatschas prendidas en locaziun n'adempleschan per gronda part betg pli las pretensiuns da spazi ch'èn necessarias per in manaschi effizient e degn d'ina scola auta. Als lieus actuals manca plinavant il spazi per sviluppar vinavant il dumber da studentas e students e per extender la purschida da scolaziun. Cun reunir tut ils lieus en in nov Center da scola auta spezialisada vegnan eliminadas las flaivlezzas da l'infrastructura existenta e resultan perspectivas progressivas che favuriseschan innovaziuns e che permettan ina meglra colliaziun entaifer la scola auta. A medem temp duai il nov edifizi metter a disposiziun ina infrastructura che po vegnir duvrada en moda flexibla, che po optimar ils process e pussibilitar ina instrucziun e perscrutaziun prospectiva.
Avantatg dal lieu a l'adressa cumprovada
Cun reunir ils numerus lieus a la Pulvermühlestrasse po la SASGR garantir ses avantatg dal lieu en il quartier Cuira Vest. Quest quartier subescha in ferm svilup. L'attractivitad da la scola auta profita da sia vischinanza directa a la zona da recreaziun, da la vasta purschida da temp liber sco er da la buna colliaziun cun la futura staziun da Cuira Vest e cun l'access a l'autostrada Cuira Sid.
En la sessiun d'october 2018 ha il Cussegl grond acceptà da realisar in Center da scola auta a la Pulvermühle ed incumbensà la Regenza d'elavurar ina missiva da construcziun. A chaschun da la votaziun dal pievel dals 29 da november 2020 ha il suveran da la citad da Cuira acceptà da ceder terren al chantun e d'attribuir quest terren a la zona per edifizis e per stabiliments publics, per pudair realisar il Center da scola auta.
Project da construcziun persistent cun utilisaziun flexibla
Las premissas per l'utilisaziun futura da l'edifizi nov sco part dal Center da scola auta spezialisada èn favuraivlas pervia da la buna integraziun en l'architectura urbana e pervia da la proxima vischinanza a l'edifizi principal actual. Il terren disponibel vegn duvrà cun quità. Las surfatschas libras effectueschan in svilup persistent dal Center da scola auta spezialisada dal Grischun ed ina concentraziun vers anen. Ils custs dal ciclus da vita survegnan medemamain ina gronda attenziun. L'edifizi nov sa basa sin concepts da spazi averts e flexibels e pussibilitescha in mantegniment simpel.
L'architectura, la structura purtanta, la tecnica d'edifizis e la persistenza vegnan tractadas en moda equivalenta ed integrala en il project da construcziun. La finamira è quella da retrair la laina da construcziun per il nov Center da scola auta sche pussaivel dals guauds indigens e da rinforzar uschia l'economia forestala e l'economia da laina sco er da reducir las emissiuns da CO2 che resultan tras las lavurs da construcziun. Principalmain duai vegnir duvrada laina betg collada respectivamain betg tractada.
Ils custs per l'edifizi nov dal Center da scola auta spezialisada importan 178 milliuns francs. La Confederaziun vegn probablamain a contribuir var 27 milliuns francs.
Sch'il Cussegl grond ed il pievel grischun acceptan il project ed il credit d'impegn, èsi previs che las lavurs da construcziun per l'edifizi nov cumenzian l'atun 2024. Igl è previs da surdar l'edifizi nov Center da scola auta spezialisada dal Grischun a la SASGR per la fin da l'onn 2027 e da cumenzar cun il manaschi da scola auta la primavaira 2028. La terminaziun dal project, inclusiv la renovaziun – per motivs da vegliadetgna – dal lieu principal existent a la Pulvermühlestrasse è planisada per l'onn 2030.
Visualisaziuns:
Foto 2,
Foto 3,
Foto 4
Agiuntas:
Infurmaziuns:
Cusseglier guvernativ dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch
Responsabladad: Regenza