Questa primavaira èn gia vegnidas applitgadas per la tschintgavla giada dronas equipadas cun cameras termicas per salvar ansiels-chavriel. Grazia al grond engaschament da las chatschadras e dals chatschaders grischuns sco er da las puras e dals purs han ins uschia pudì chattar 520 chavriels novnaschids ed als salvar d'ina eventuala mort tras la maschina da segar.

Cun 1786 sgols han las voluntarias ed ils voluntaris cuntanschì in nov record per salvar ils ansiels-chavriel. Els èn sgulads questa primavaira 66 sgols dapli che durant l'onn da record vertent 2022 (1720 sgols). En l'entir chantun èn vegnids salvads uschia 520 ansiels-chavriel. Fin ussa è quai la stagiun da salvament d'ansiels-chavriel cun il segund grond success suenter l'onn 2022 cun 552 animals salvads.

Da mez matg fin mez fanadur 2023 èn stads en viadi mintgamai la damaun baud u la saira tard var 180 pilotas e pilots da dronas per il bain dals chavriels. Ultra da quai èn stadas en acziun durant quest temp tut en tut 25 dronas mintga di da segar en quasi tut las regiuns dal Grischun.

Dapi il cumenzament dal project l'onn 2019 èn tut en tut var 2320 animals vegnids salvads d'ina eventuala mort tras la maschina da segar. Quest grond dumber è mo pussaivel grazia a l'engaschament nunstanclentaivel da bleras pilotas e blers pilots da dronas motivads.

Mantegnair l'aut nivel
Las persunas ch'èn necessarias per manischar ina drona vegnan recrutadas per gronda part ord las secziuns da chatschaders en las regiuns pertutgadas, nua ch'ellas vegnan er scoladas. Mintgina e mintgin po daventar pilota u pilot, sch'ella u el demussa in inschign da laschar sgular dronas ed ha interess da salvar ansiels-chavriel.

Tut tenor la regiun vegnan las acziuns coordinadas cuminaivlamain da las secziuns, da la surveglianza da chatscha cumpetenta e da la pura u il pur, ubain che las secziuns procedan en atgna reschia. Aposta per quest intent han las chatschadras ed ils chatschaders endrizzà in servetsch da pichet. Il project na pudess betg vegnir realisà senza la prontezza da las chatschadras e dals chatschaders e senza la collavuraziun cun las puras ed ils purs.

La finamira èsi da mantegnair ils proxims onns quel aut nivel da success ch'è resultà en il fratemp e da survegnir ulteriuras pilotas e pilots per salvar ansiels-chavriel.

Fotografias agiuntadas:

Infurmaziuns:

• Regula Bollier, Uffizi da chatscha e pestga dal Grischun, tel. +41 81 257 21 66 (cuntanschibla da las 10.00 fin las 12.00), e‑mail Regula.Bollier@ajf.gr.ch
• Toni Hofmann, president da la tgira Uniun grischuna da chatschaders da patenta (UGCP), tel. +41 79 690 84 81, e‑mail duchliranch@bluewin.ch

Responsabladad: Uffizi da chatscha e pestga