Il chantun Grischun, la Corporaziun da vischnancas per il traffic public en l'Engiadin'Ota e l'Uffizi federal da traffic (UFT) han l'intenziun d'incumbensar er en l'avegnir la firma Bus und Service SA (Bus d'Engiadina) cun il manaschi da las lingias da bus regiunalas en l'Engiadin'Ota. Ultra da quai duai la firma Bus und Service SA surpigliar a partir dal december 2027 da nov il manaschi da las lingias da bus regiunalas en Bregaglia fin a Clavenna (I) sco er dal Palm Express da San Murezzan fin a Lugano. Actualmain vegnan questas lingias purschidas da l'AutoDaPosta SA.

Sco empustaders dal traffic public han il chantun Grischun, la Corporaziun da vischnancas per il traffic public en l'Engiadin'Ota e l'Uffizi federal da traffic (UFT) publitgà la fin da december 2022 l'incumbensa per las lingias da bus regiunalas en l'Engiadin'Ota ed en Bregaglia inclusiv il Palm Express (da San Murezzan fin a Lugano). L'incumbensa cumpiglia il manaschi da tut en tut 10 lingias da bus cun in volumen da pli che 3 milliuns kilometers per onn per la perioda dal december 2024 (Engiadin'Ota) respectivamain dal december 2027 (Bregaglia e Palm Express) fin il december 2034. Ultra da quai sa basa l'incumbensa sin in nov concept da purschidas extendì, che duai vegnir realisà cun la midada da l'urari il december 2024. Las lingias en l'Engiadin'Ota vegnan purschidas gia oz da la firma Bus und Service SA (Bus d'Engiadina), quellas en Bregaglia sco er il Palm Express da l'AutoDaPosta SA.

Trais interpresas da transport han inoltrà in'offerta
A la submissiun èn sa participadas trais interpresas da transport: la Bus und Service SA, l'AutoDaPosta SA e la Bus Ostschweiz SA. Las offertas èn vegnidas giuditgadas tenor ils criteris d'agiudicaziun ch'eran vegnids fixads precedentamain. Il giudicament ha resguardà per 40 pertschient il pretsch e per 60 pertschient la qualitad. Tenor quest giudicament ha la firma Bus und Service SA inoltrà l'offerta cun la meglra relaziun tranter il pretsch e la prestaziun.

Cun surdar l'incumbensa a la firma Bus und Service SA èsi garantì, che las passagieras ed ils passagiers dal traffic public regiunal en l'Engiadin'Ota ed en Bregaglia profitan da servetschs da buna qualitad. A medem temp ha il maun public sco empustader la garanzia, ch'ils servetschs vegnan furnids a cundiziuns che correspundan al martgà. Tras il diever consequent da vehichels ibrids e tras il diever augmentà da bus electrics tar la firma Bus und Service SA, daventa il traffic public plinavant anc pli persistent en l'avegnir.

A partir da l'onn 2028 vegnan tut las lingias manadas sut la marca «Engadin Bregaglia Bus». Sche la firma Bus und Service SA dovra persunal supplementar, vegn ella a porscher – en il rom da la surpigliada da las lingias – a las emploiadas ed als emploiads pertutgads da l'AutoDaPosta SA in engaschament a cundiziuns usitadas en la branscha.

Il UFT ha infurmà ils offerents davart l'intenziun da surdada dals empustaders e vegn ussa ad introducir la procedura da concessiun respectiva. Il november da quest onn duai questa procedura vegnir terminada cun la decisiun da surdada contestabla. Correspundentamain n'ha la decisiun anc betg vigur legala.

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, e‑mail Carmelia.Maissen@diem.gr.ch (cuntanschibla da las 11.00 fin las 12.00)
• Thierry Müller, manader Traffic public, Uffizi d'energia e da traffic, tel. +41 81 257 36 04 (cuntanschibel da las 10.00 fin las 18.00), e‑mail Thierry.Mueller@aev.gr.ch
• Monzi Schmidt, presidenta da la Corporaziun da vischnancas per il traffic public en l'Engiadin'Ota, tel. +41 81 851 10 39 u +41 79 291 45 41 (cuntanschibla da las 10.00 fin las 13.30), e‑mail Monzi.Schmidt@regio-maloja.ch

Responsabladad: Departament d'infrastructura, energia e mobilitad