En Svizra assista mintga quarta persuna ses confamigliars. Quest engaschament n'è betg mo prezius ed impurtant per la persuna assistida, mabain er per la societad. Ils 30 d'october 2023, il Di interchantunal dals confamigliars che gidan, engrazian plirs chantuns – er il Grischun – cun in'acziun a favur da las persunas che assistan e tgiran.

Las persunas che assistan lur confamigliars giogan ina rolla decisiva en nossa societad. Savens pon persunas pli veglias, malsaunas u impedidas abitar vinavant a chasa mo grazia al sustegn da lur famiglia.

Plan d'acziun grischun per persunas che assistan e tgiran lur confamigliars
Per pudair sustegnair meglier la lavur preziusa da las persunas che assistan e tgiran lur confamigliars sco er per dar ad ellas dapli renconuschientscha e stima, ha l'Uffizi da sanadad lantschà il plan d'acziun grischun «Sustegn e distgargia per persunas che assistan e tgiran lur confamigliars». Quest plan ha la finamira da colliar meglier las persunas spezialisadas, da metter a disposiziun avunda infurmaziuns a las persunas pertutgadas e la finala da meglierar las cundiziuns per las persunas che assistan e tgiran lur confamigliars.

Las mesiras dal plan d'acziun han plinavant la finamira da rinforzar l'atgna responsabladad da las persunas che assistan e tgiran lur confamigliars sco er lur cumpetenzas en chaussas da la sanadad. Ultra da quai prevesa il plan d'acziun d'indemnisar en l'avegnir las prestaziuns d'assistenza e da tgira. Las persunas che tgiran lur confamigliars en il chantun Grischun duain survegnir in supplement da tgira per lur lavur. La Regenza ha l'intenziun da metter a disposiziun a partir da l'onn 2025 mintga onn var 2,4 milliuns francs per quest intent. Il Departament da giustia, segirezza e sanadad è vegnì incumbensà d'elavurar il project da lescha en chaussa.

In ulteriur accent dal plan d'acziun grischun è quel da meglierar l'infurmaziun e la sensibilisaziun dals patruns. En quest connex sa baratta l'Uffizi da sanadad cun l'Uffizi da persunal da l'administraziun chantunala sco er cun las federaziuns professiunalas. «En l'avegnir vegn il sustegn dals patruns per persunas che tgiran lur confamigliars ad esser in aspect impurtant per l'attractivitad da la plazza da lavur» di Ruedi Leuthold, manader da l'Uffizi da sanadad.

Pitschna pausa per il Di dals confamigliars che gidan
Ils 30 d'october, a chaschun dal Di dals confamigliars che gidan, engrazia l'Uffizi da sanadad, ensemen cun differentas organisaziuns spezialisadas, cun in regal da té a tut quellas persunas che s'engaschan di per di per lur confamigliars ch'èn malsauns e che dovran assistenza. Il pitschen regal vegn surdà als confamigliars che gidan da las organisaziuns spezialisadas participantas. In'ulteriura acziun è in suentermezdi da teater che vegn organisà dumengia, ils 29 d'october 2023, a San Murezzan. L'occurrenza duai esser in'occasiun per las persunas che assistan e tgiran lur confamigliars, da sa permetter ina pitschna pausa.

Cun las duas acziuns engrazia l'Uffizi da sanadad e renda attent ch'igl è – gist per las persunas che tgiran lur confamigliars – impurtant da pensar er a sasezzas e da tancar nova energia, per sezzas restar saunas.

Pussaivladads da sustegn e da distgargia
Sin la plattafurma chantunala chattan ils confamigliars infurmaziuns davart pussaivladads da distgargia u da sustegn finanzial, dentant er cussegls per la cumpatibilitad cun l'activitad da gudogn. Ils patruns pon s'infurmar davart ils dretgs e las obligaziuns e survegnan ideas per pudair sustegnair las lavurantas ed ils lavurants en situaziuns difficilas. In element impurtant da la plattafurma è la banca da datas cumplessiva dals contacts e da las adressas dals servetschs da sustegn.

Dapli infurmaziuns:

www.angehoerige-betreuen.gr.ch

«Chuenägele», in suentermezdi da teater per persunas che tgiran lur confamigliars, en preschientscha dal president da la Regenza Peter Peyer: dumengia, ils 29 d'october 2023, da las 15.00 fin las 16.00, suenter vegn offrì in aperitiv, en la Brigitte & Henri B. Meier Concert Hall (Hotel Laudinella), a San Murezzan.

Infurmaziuns:

Rudolf Leuthold, manader da l'Uffizi da sanadad dal Grischun, tel. +41 81 257 26 41 (cuntanschibel da las 16.00 fin las 17.30), e‑mail Rudolf.Leuthold@san.gr.ch

Responsabladad: Uffizi da sanadad