La Regenza ha concedì ina contribuziun chantunala per novs indrizs da far naiv al Corvatsch ed ha garantì in sustegn finanzial a la secziun Rätia dal CAS per renovar la chamona da Carschina. Plinavant ha ella approvà la concessiun dal dretg da las auas per l'ovra idraulica Casti Vest.
Contribuziun chantunala per novs indrizs da far naiv al Corvatsch
En il rom da la Nova politica regiunala da la Confederaziun (NPR) ha la Regenza concedì a la firma Alpin Infra SA ina contribuziun federala dad 1,45 milliuns francs per construir indrizs da far naiv al Corvatsch. Quest emprest è collià cun ina contribuziun chantunala equivalenta da var 243 250 francs.
Il project è budgetà cun custs totals da circa 4,25 milliuns francs. El sa cumpona dals projects parzials «runal Margun», «colliaziun Margun – La Chüdera», «Margun Surlej – Murtel» e «pista Cristins». Ils indrizs da far naiv planisads augmentan la garanzia da naiv al Corvatsch. Quai permetta d'optimar la purschida da pistas ennavadas en il territori da skis principal.
© Corvatsch SA
En il rom da la Nova politica regiunala da la Confederaziun (NPR) ha la Regenza concedì a la firma Alpin Infra SA ina contribuziun federala dad 1,45 milliuns francs per construir indrizs da far naiv al Corvatsch. Quest emprest è collià cun ina contribuziun chantunala equivalenta da var 243 250 francs.
Sustegn finanzial per renovar la chamona da Carschina
La chamona da Carschina dal Club alpin svizzer (CAS) è situada sin il territori communal da Luzein en il Partenz sin 2236 meters sur mar. Per renovar la chamona da Carschina ha la secziun Rätia dal CAS dumandà il chantun Grischun per in emprest en il rom da la Nova politica regiunala da la Confederaziun (NPR). La Regenza ha concedì a l'uniun in emprest federal NPR da 625 000 francs, quai en cumbinaziun cun ina contribuziun chantunala equivalenta da var 145 110 francs.
En il rom da la renovaziun duai la chamona existenta vegnir mantegnida, cumplettada e sanada il meglier pussaivel. L'infrastructura da la chamona vegn optimada, quai cun equipar la chamona tenor il stadi da la tecnica il pli actual ed er cun tegnair quint d'aspects ecologics. La chamona vegn adattada als novs basegns dals giasts. Per quest intent vegn tranter auter reducì il dumber da plazs da durmir dad 85 a 66 per pudair porscher dapli confort. Las lavurs da renovaziun duain cumenzar il 1. da zercladur 2025. La reavertura è previsa per la fin da l'onn 2026. Per renovar la chamona da Carschina quinta la secziun Rätia dal CAS cun custs totals da var 2,6 milliuns francs.
© Secziun Rätia dal CAS
La chamona da Carschina dal Club alpin svizzer (CAS) è situada sin il territori communal da Luzein en il Partenz sin 2236 meters sur mar. Per renovar la chamona da Carschina ha la secziun Rätia dal CAS dumandà il chantun Grischun per in emprest en il rom da la Nova politica regiunala da la Confederaziun (NPR). La Regenza ha concedì a l'uniun in emprest federal NPR da 625 000 francs, quai en cumbinaziun cun ina contribuziun chantunala equivalenta da var 145 110 francs.
Approvà la concessiun dal dretg da las auas per l'ovra idraulica Casti Vest
La Regenza ha approvà la concessiun dal dretg da las auas ed il project per l'ovra electrica Casti Vest. Dapi l'onn 1949 utilisescha l'Ovra electrica da la citad da Turitg (ewz) l'aua da la Gelgia en l'ovra electrica Casti Vest per producir electricitad. La concessiun dal dretg da las auas è ida a fin il fanadur 2022. Cunquai che la Regenza ha gia approvà ina regulaziun transitorica, èsi pussaivel da cuntinuar cun il manaschi fin la fin da l'onn 2024, quai cun consegnar ina quantitad minimala d'aua restanta. En il rom d'ina renovaziun da la concessiun ha la ewz ussa survegnì il dretg d'utilisar la forza idraulica fin l'onn 2050.
Pervia da novas pretensiuns dal dretg davart la protecziun da las auas ston vegnir prendidas mesiras architectonicas per garantir las consegnas d'aua restanta en l'avegnir. Per in'ovra electrica d'aua da dotaziun a la serra d'accumulaziun Burvagn èn previsas investiziuns da circa 2,6 milliuns francs. Ussa sto anc la regenza da la citad da Turitg acceptar la concessiun.
© ewz
La Regenza ha approvà la concessiun dal dretg da las auas ed il project per l'ovra electrica Casti Vest.
Contribuziuns per associaziuns da sport grischunas
Ord la finanziaziun speziala Sport (FS Sport) ha la Regenza concedì contribuziuns da totalmain 1,25 milliuns francs a las organisaziuns che fan part da l'Associaziun grischuna da sport (AGS). En la sessiun d'october 2023 ha il Cussegl grond auzà la contribuziun pauschala annuala dad 1 milliun francs, che ha valì dapi l'onn 2010 per las associaziuns da sport grischunas. Oravant tut il sport da massa duai profitar da quest augment. Las associaziuns da sport grischunas prestan ina lavur da basa impurtanta per promover il sport da massa e da prestaziun. Cun las contribuziuns pauschalas per la lavur generala da las associaziuns e da las uniuns sustegna il chantun las prestaziuns da las 40 organisaziuns da sport a favur da las uniuns da sport grischunas.
© Steafan Michael, SC Beverin
Ord la finanziaziun speziala Sport (FS Sport) ha la Regenza concedì contribuziuns da totalmain 1,25 milliuns francs a las organisaziuns che fan part da l'Associaziun grischuna da sport (AGS).
