En il rom da l'audiziun ha ina gronda part da las vischnancas, da las partidas e dals ospitals refusà la pussaivladad da conceder emprests transitorics als ospitals che han difficultads finanzialas. La Regenza desista da persequitar vinavant la proposta per garantir la liquiditad e da far avanzar ina revisiun parziala da la Lescha chantunala per promover la tgira da persunas malsaunas. Percunter duai il Model directiv concernent l'organisaziun dal provediment da la sanadad en il chantun Grischun vegnir reelavurà fin la fin dal 2025. Tant las partidas ch'èn stadas participadas a la consultaziun sco er la Regenza dattan gronda prioritad a quest giavisch.

Il november 2024 ha la Regenza intimà ina revisiun parziala da la Lescha chantunala per promover la tgira da persunas malsaunas e l'assistenza da persunas attempadas e da persunas che basegnan tgira (Lescha per promover la tgira da persunas malsaunas). Uschia avess d'ina vart il chantun survegnì la pussaivladad da conceder emprests transitorics als ospitals e da l'autra vart avessan las regiuns da sanadad obtegnì dapli flexibilitad per concepir l'organisaziun dal provediment da basa. Sulettamain la pussaivladad da flexibilisar la furma d'organisaziun ha chattà per gronda part accoglientscha en l'audiziun davart la revisiun parziala da la Lescha per promover la tgira da persunas malsaunas.

Ni ils ospitals, ni las regiuns ni las vischnancas ed er betg las partidas han in interess vi d'emprests transitorics. «Jau sun surprais en moda positiva da quests resuns», di il cusseglier guvernativ Peter Peyer, schef dal Departament da giustia, segirezza e sanadad. «Els mussan che las vischnancas e las regiuns sco er las instituziuns èn conscientas da lur responsabladad en il provediment da la sanadad.»

En ina gronda part da las respostas è dentant vegnì exprimì il giavisch d'avair ina clera strategia chantunala e d'elavurar in model directiv concernent l'avegnir dal provediment da la sanadad en il chantun Grischun. Questas lavurs èn gia en curs, vegnan ussa però intensivadas. Il Model directiv concernent l'organisaziun dal provediment da la sanadad en il chantun Grischun datescha da l'onn 2013. La stad 2024 ha l'Uffizi da sanadad cumenzà – en collavuraziun cun il Departament da giustia, segirezza e sanadad – a reelavurar il Model directiv concernent l'organisaziun dal provediment da la sanadad. D'ina vart duai il model directiv revedì servir sco basa per la planisaziun dals ospitals 2026. Da l'autra vart duai el sclerir eventualas adattaziuns legalas necessarias, sco per exempel la flexibilisaziun da la furma d'organisaziun dals furniturs da prestaziuns, ubain ulteriurs models da finanziaziun.

Infurmaziuns:

Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 11.00 fin las 12.00), e‑mail Peter.Peyer@djsg.gr.ch