La Regenza ha avert la consultaziun tar la revisiun parziala da la Lescha da taglia per il chantun Grischun (LT; DG 720.000). Cun questa revisiun vegn realisada l'incumbensa Hohl dals 3 da settember 2022 concernent distgargias fiscalas per famiglias e per persunas spezialisadas.

Per sa posiziunar sco chantun attractiv per famiglias prevesa il project da consultaziun d'auzar las deducziuns per uffants. Sco distgargia fiscala effizienta per las persunas cun activitad da gudogn duain las taglias sin las entradas vegnir reducidas cun auzar l'import liber da taglia tar la tariffa da la taglia sin las entradas. Da questas duas mesiras en la Lescha chantunala da taglia – da l'augment da las deducziuns per uffants e da l'auzament da l'import liber da taglia – èn pertutgadas las taglias chantunalas e communalas. En cumbinaziun cun la reducziun dal pe da taglia chantunal, ch'il Cussegl grond ha concludì per l'onn fiscal 2024 per las persunas natiralas, duai l'augment da l'import liber da taglia tar la tariffa da la taglia sin las entradas mitigiar considerablamain la grevezza fiscala da las persunas cun activitad da gudogn.

Il december 2023 ha il Cussegl grond acceptà l'incumbensa Schneider concernent l'adattaziun da la progressiun reala ed ha incumbensà la Regenza d'examinar ina futura cumpensaziun da la progressiun reala (chauda), quai en il rom da la realisaziun da l'incumbensa Hohl. L'augment da las pajas nominalas pervia da l'inflaziun, che chaschuna ina taxaziun pli auta pervia da las tariffas da taglia progressivas, l'uschenumnada progressiun fraida, vegn cumpensada tar las taglias federalas, chantunalas e communalas. La cumpart che resulta da l'augment da la capacitad da cumpra, la progressiun reala (chauda), na vegn percunter cumpensada automaticamain sin nagin plaun statal. In'examinaziun da quest fenomen ha mussà cleramain, ch'i n'exista nagin motiv per introducir ina cumpensaziun legala da questa progressiun reala en il chantun Grischun ed en las vischnancas grischunas. L'effect da la progressiun reala è adina puspè vegnì cumpensà, e temporarmain schizunt surcumpensà, sin plaun chantunal e communal cun agid da revisiuns da la Lescha da taglia e cun agid da reducziuns dal pe da taglia.

Cumenzament: 3 da fanadur 2024
Fin: 4 da october 2024