Perquai che la situaziun finanziala dals ospitals publics dal Grischun sa pegiurescha cuntinuadamain, èsi ord vista da la Regenza necessari da prender mesiras, per evitar l'insolvenza che smanatscha a curta ed a media vista als ospitals pertutgads. Tant il provediment da la sanadad decentral sco però er il provediment da center da la populaziun èn numnadamain periclitads en vista al svilup finanzial dals ospitals publics dal Grischun. Cun l'adattaziun planisada da la Lescha per promover la tgira da persunas malsaunas e l'assistenza da persunas attempadas e da persunas che basegnan tgira (Lescha per promover la tgira da persunas malsaunas, LTM; DG 506.000) duai vegnir stgaffida ina basa legala, che duai permetter a la Regenza da conceder emprests transitorics als ospitals publics per uschia procurar ch'els hajan puspè ina liquiditad suffizienta.

Pervia da la mancanza da bonitad èsi per ils blers ospitals publics dal Grischun praticamain exclus da survegnir sin il martgà da chapital emprests per garantir la liquiditad, ubain che tals emprests èn colliads cun fitg auts tschains (supplement da ristga). En cas d'ina crisa finanziala duain il chantun e las vischnancas perquai avair la pussaivladad da conceder emprests transitorics als ospitals publics dal Grischun. Per quest intent prevesa la Regenza da metter a disposiziun in credit d'impegn general da 100 milliuns francs. Ils emprests pussaivels duain gidar ils ospitals pertutgads a surmuntar periodas da crisa finanziala. Cun agid da mesiras da sanaziun duain ils ospitals puspè pudair cuntanscher la rentabilitad resp. la quota d'autofinanziaziun necessaria. Tras la pussaivladad da conceder emprests duain a medem temp vegnir rinforzadas las aspectativas dal martgà da chapital e vegnir impedida in'eventuala perdita da confidenza cun las respectivas consequenzas negativas per survegnir chapital ester.

Sch'i vegnan concedids emprests, profitan en emprima lingia las vischnancas purtadras dals ospitals pertutgads. Senza emprests stuessan las vischnancas – sco purtadras dal provediment da sanadad public – star bunas sezzas cumplainamain per lur ospitals en situaziuns da crisa. Perquai duain las vischnancas sa participar cun 50 pertschient ad eventualas perditas che resultan da la concessiun d'emprests. Correspundentamain duain emprests vegnir concedids mo cun il consentiment da la maioritad da las vischnancas da la regiun da provediment da la sanadad respectiva.

Ils retschaviders dals emprests ston ultra da quai preschentar a la Regenza in plan da mesiras che sto garantir, ch'i resultia a curta fin a media vista puspè in resultat da gestiun positiv.

Pervia da las relaziuns finanzialas difficilas duain las regiuns da provediment da la sanadad plinavant survegnir la pussaivladad da transfurmar lur ospitals – en cas da basegn – en centers da sanadad ambulants. En quest connex vegn introducida ina regulaziun che duai simplifitgar las decisiuns da las regiuns da provediment da la sanadad concernent lur organisaziun. Decisiva duai mintgamai esser ina decisiun da maioritad da las persunas cun dretg da votar da las vischnancas respectivas.

Igl è planisà da metter en vigur la revisiun parziala per il 1. da schaner 2026.

Cumenzament: 12 da november 2024

Fin: 16 da december 2024