L'intent da la revisiun parziala da la lescha per promover la tgira da persunas malsaunas e l'assistenza da persunas attempadas e da persunas che basegnan tgira (LTM; DG 506.000) è quel da realisar las mesiras che la regenza ha proponì en il rapport davart la finanziaziun dals ospitals e da la tgira en il chantun Grischun (M 2015-2016 p. 1035 ss.) e ch'il cussegl grond ha approvà en la sessiun da zercladur 2016. Ultra da quai prevesa la revisiun parziala da la LTM ina novaziun en il sectur da la finanziaziun dals custs da tgira e d'assistenza d'abitantas e d'abitants da chasas da persunas attempadas e da tgira che dovran extraordinariamain blera tgira e/u assistenza. Per questas persunas duai la regenza vegnir autorisada da renconuscher – supplementarmain als custs che dastgan vegnir mess a quint sin basa da la classificaziun dal SCRA – ulteriurs custs per lur tgira ed assistenza. Per promover dimoras curtas per distgargiar las persunas, che assistan e tgiran lur confamigliars, duai la regenza ultra da quai pudair differenziar ils custs da pensiun renconuschids tenor ils dis da tgira per dimoras curtas cumprovads da las chasas da persunas attempadas e da tgira. La finala duain las contribuziuns chantunalas che vegnan reducidas, sch'i na vegn betg mess a disposiziun il dumber da plazzas da scolaziun per professiuns dals fatgs da sanadad e socials fixà da la regenza, vegnir pajadas a quellas instituziuns che mettan a disposiziun dapli plazzas da scolaziun che pretendì. Uschia duain vegnir remuneradas quellas instituziuns che sa stentan extraordinariamain per la scolaziun.  

Avertura: 22 da december 2016
Scadenza dal Termin: 22 da mars 2017