Duas giadas tantas infracziuns sco avant diesch onns
La nuncalculabladad d’acziuns criminalas è per bleras persunas in problem e chaschuna che las abitantas ed ils abitants sa sentan malsegirs. La polizia chantunala ha chapientscha e sa stenta da reagir cun mesiras da segirtad extendidas. Cun il sustegn da l’assicuranza „Turitgaisa“ sensibilisescha la polizia la populaziun durant la Gehla en ina preschentaziun da multimedia "Infracziun - directamain sut il nas". Senza ristgas e senza effects secundars emprendan ils preschents ad enconuscher durant otg minutas las specias d’infracziun las pli frequentas.
In’infracziun è per ils pertutgads in’attatga sin lur sfera intima. En il decurs dal davos decenni èn las infracziuns en Svizra s’augmentadas per circa 80 pertschient: duas giadas tantas infracziuns sco avant diesch onns. En il Grischun èn quai fin la fin d’avust 1999 gia circa 2'500 delicts d‘enguladitsch. Quai giustifitgescha ina preoccupaziun augmentada e mesiras correspundentas. Cun l’exposiziun da multimedia "Infracziun – directamain sut il nas" – in servetsch da l‘assicuranza „Turitgaisa“ – vegn la populaziun sensibilisada emoziunalmain. L’exposiziun è dentant er in appel a mintgin da surprender sez responsabladad. Senza la prontadad da s’occupar da si’atgna situaziun na po nagin prevegnir efficaziamain ad infracziuns. A l’intern d’in pavigliun vegnan las visitadras ed ils visitaders da la Gehla fascinads tras effects da glisch dirigids da computers, implants d’audio e trics mecanics.

Prevenziun – gist uschè impurtant sco ina buna assicuranza
Per l‘assicuranza „Turitgaisa“ èsi impurtant da prestar ina contribuziun activa per evitar infracziuns e per garantir la segirezza da ses clients. Ellas s’engaschan perquai per la campagna da prevenziun "Infracziun – directamain sut il nas". Per quest engaschament datti duas raschuns principalas, sco Alois Moser da l’agentura generala da Cuira explitgescha: "D’ina vart n’è la cuminanza dals assicurads betg pronta da finanziar ina criminalitad d’infracziuns cun premias creschentas. Da l’autra vart ha in’infracziun savens effects sin ils pertutgads che surpassan per bler la regulaziun dil donn finanzial. La tema e la malsegirtad che restan, ma er la furia e la dolur chaschunadas tras la perdita da valurs commemorativas na pon betg vegnir cumpensadas cun daners."

Cussegliaziun professiunala
La tscherna dal gener da prevenziun – indrizs d’alarm, portas rinforzadas euv. – dependa da la caracteristica dals abitants e da lur basegns spezials da segirezza. Gidai ad evitar infracziun. Nus ans allegrain da beneventar Vus a l’exposiziun speziala CUN SEGIREZZA ENCUNTER IL NOV MILLENNI a la Gehla. En la halla 5 As pudais Vus laschar cussegliar d’experts da la „Turitgaisa“ e da la cussegliaziun da segirezza da la polizia chantunala dal Grischun davart las mesiras mecanicas, organisatorias e da tecnica d‘assicuranza. La purschida da cussegliaziun vegn cumplettada tras offriders dal martgà da segirezza che preschentan soluziuns individualas per locataris e possessurs d’atgnas chasas u abitaziuns.
Quelle: Polizia chantunala dal Grischun