Il dumber dals malfatgs sco er dals accidents da traffic è s'augmentà l'onn passà. Quai mussa la statistica criminala e dals accidents da traffic 2003 (www.kapo.ch) ch'è vegnida preschentada da la polizia chantunala grischuna il mardi ad in conferenza da medias a Cuira. Il dumber dals malfatgs en il Grischun è s'augmentà per var indesch pertschient sin 9'878 cas, quai è la rata da creschientscha la pli auta dapi 1996. Tar 2'675 accidents da traffic (nov pertschient dapli che l'onn precedent) èn vegnidas per la vita 25 persunas, 1'005 persunas èn vegnidas blessadas.

Il schef da la polizia da regiuns e da traffic, Robert Willi, ha menziunà l'augment massiv dals accidents cun motos per 27 pertschient. Da las totalmain 25 victimas mortalas en accidents da traffic (onn precedent 31) è la part dals motociclists e dals cunmotociclists cun 7 (8) auta. In terz dals utilisaders da las vias ch'èn vegnids blessads e mazzads avevan 20 fin 34 onns. Ils pli frequents èn stads accidents da schlitta resp. accidents persunals pervia d'inattenziun, nun- adattaziun da la spertadad e distracziun. Surprendentamain blers accidents èn succedids tranter las 15 e las 21. En la citad da Cuira èn succedidas fitg bleras collisiuns da davos ed accidents cun midar direcziun.

Grond augment dals ladernitschs
3'353 da totalmain 9'878 malfatgs han pudì vegnir sclerids. Quai correspunda ad ina quota da 34 pertschient (onn precedent 24 pertschient). Sco che Gianfranco Albertini, schef da la polizia criminala, ha menziunà, èn stads participads 1'549 Svizzers e 1'258 esters als malfatgs sclerids.
Ina gronda rata da creschientscha han ins pudì registrar tar ils delicts da facultad cun in aug- ment da totalmain 14 pertschient. 6'428 malfatgs èn vegnids registrads l'onn passà, 21 per- tschient dapli che l'onn precedent. En quest connex è il dumber dals ladernitschs cun infracziun e dals ladernitschs ord tastga schizunt s'augmentà per 155 pertschient. Sa reducids cleramain èn perencunter ils assagls da rapiment (da 36 l'onn 2002 sin 21 l'onn 2003) sco er ils grevs delicts sexuals. 9 violaziuns (onn precedent 14), 10 (23) acts sexuals cun uffants e 4 (9) constricziuns sexualas èn vegnids sclerids per gronda part. Eruids èn vegnids 85 (110) mortoris extraordinaris, tranter quels 23 (35) suicids, 12 (14) accidents en muntogna, 6 (10) en lavina, 5 (6) da lavur, 4 (4) da sgol, 4 (3) da skis e 2 (0) da bogn. Plinavant han ins stuì registrar 2 (5) morts da drogas. In delict da mazzament (betg sclerì) e trais emprovas da mazzament sapientiv èn vegnids intercurids.
Stabil è restà il dumber dals delicts d'incendi: Tar 19 (15) da 91 (91) cas d'incendi èsi sa tractà d'in incendiament. Il dumber da las denunzias per cuntravenziun cunter la lescha da narcotics è s'augmentà da 885 a 967.

Situaziun da persunal precara tar la polizia
“Il svilup da la criminalitad è adina er il reflex da la situaziun economica actuala”, ha constatà il cumandant da polizia Markus Reinhardt a la conferenza da medias. Pervi da sias resursas per- sunalas limitadas stoppia la polizia sa concentrar sin sias incumbensas centralas. La prevenziun pateschia da quai e savens possia la polizia agir pir suenter ina denunzia. La reorganisaziun da la polizia chantunala grischuna dapi il cumenzament da l'onn 2004 haja cumenzà bain. En il rom da las mesiras da spargn chantunalas saja la polizia dentant sfurzada da far ina planisaziun da renunzia.

Quelle: polizia chantunala grischuna