L'accident en la Viamala influenzescha il dumber da victimas da traffic da l'onn 2006

Schebain ch'il dumber total dals accidents da traffic è sa reducì levamain l'onn 2006, han ins stuì cumplanscher en il chantun Grischun dapli persunas mazzadas che l'onn prece- dent. Il dumber dals delicts sa chatta en il medem rom sco l'onn 2005. Quai mussan la stati- stica criminala e la statistica dals accidents da traffic 2006 ch'èn vegnidas preschentadas da la polizia chantunala grischuna il mardi a chaschun d'ina conferenza da medias a Cuira.

"La statistica criminala e la statistica dals accidents da traffic dal Grischun duain danovamain mussar tendenzas e midadas er en cumparegliaziun cun l'entira Svizra, uschenavant che las cifras respectivas èn gia avant maun. Las valurs statisticas èn adina puspè er in motiv per la polizia da metter prioritads", ha punctuà Markus Reinhardt, il cumandant da la polizia chantunala dal Grischun. "Tar las prioritads per l'onn 2007 tutga er il cumbat cunter la violenza da giuvenils."

Campagna cunter la pedocriminalitad en l'internet
L'onn 2007 vegn la polizia chantunala dal Grischun a sustegnair activamain la campagna che la prevenziun svizra da la criminalitad ha lantschà cunter la pedocriminalitad en l'internet. Gia l'onn passà èn tut las collavuraturas e tut ils collavuraturs vegnids orientads davart la campagna che ha gì lieu en l'entira Svizra e che porta il titel "stop a la pornografia d'uffants en l'internet". Cun sia campagna da prevenziun sa drizza la polizia chantunala ussa a la publicitad: cun agens stans d'infurmaziun a la HIGA ed a la GEHLA sco er cun referats per scolaras, per scolars e per ils geniturs en tut il chantun.

Atgna culpa tar passa 80 pertschient dals accidents cun motos
L'onn passà èn capitads en tut 2'419 accidents da traffic sin las vias grischunas. Quai correspunda ad ina reducziun dad 1 pertschient en cumparegliaziun cun l'onn precedent. Il dumber da las persunas blessadas è sa reducì visavi l'onn precedent dad 835 ad 821. "Areguard las persunas mazzadas vegn la statistica dals accidents da traffic da l'onn 2006 influenzada fermamain da l'accident da traffic dals 16 da settember 2006 sin la A13 en il tunnel da la Viamala cun 9 persunas mortas", sco quai che Robert Willi, schef da la polizia da regiuns e da traffic, ha explitgà.
Il dumber da las persunas che han gì accidents mortals cun motos è sa reducì da 13 ad 8 persunas. Suenter dus onns cun cifras autas han ins uschia puspè cuntanschì il nivel da l'onn 2003. "Tar passa 80 pertschient dals accidents cun motos èn las motociclistas ed ils motociclists sezs la culpa", explitgescha Robert Willi vinavant.
Tar las categorias da vegliadetgna da las persunas disgraziadas po – per fortuna – vegnir registrada ina reducziun da 101 a 79 persunas tar la gruppa da 20 fin 24 onns. Questa categoria da vegliadetgna dumbra dentant anc adina las pli bleras persunas disgraziadas. Per 26 pertschient è dentant s'augmentà il dumber da persunas disgraziadas da la categoria da vegliadetgna a partir da 65 onns.

Naginas midadas marcantas tar il dumber da delicts
Il dumber total dals delicts ch'èn vegnids registrads l'onn 2006 en il chantun Grischun sa chatta sin il nivel da l'onn precedent. Cun 3'318 delicts sclerids è vegnida cuntanschida ina quota da 38,6 pertschient; er quai correspunda al nivel da l'onn precedent. Als delicts sclerids èn stadas participadas 1'938 persunas svizras e 1'138 persunas estras. La quota da las persunas minorennas importa 15,9 pertschient.
"Ina tendenza sco tala en tschertas categorias da delicts na sa lascha betg constatar", di Gianfranco Albertini, schef da la polizia criminala. "En il rom dals delicts da facultad datti dentant in augment marcant tar ils enguladitschs ed in pitschen augment tar ils frauds, entant ch'ils cas da rapina èn sa reducids."
Delicts da mazzament u emprovas da mazzament hai dà 4 (onn precedent 2). La polizia chantunala dal Grischun ha retschertgà l'onn 2006 en 100 (94) mortoris extraordinaris, tranter quels 26 (35) suicidis, 14 (10) accidents da muntogna, 8 (8) accidents da lavina, 1 (1) accident da skis, 4 (1) accidents da bogn, 7 (0) accidents da sgol e 4 (4) accidents da lavur. Persunas ch'èn mortas da drogas èn vegnidas registradas 3 (6).
Ils grevs delicts sexuals n'èn betg s'augmentads. Uschia han ins registrà 12 (10) violaziuns, 8 (10) acts sexuals cun uffants e 6 (13) constricziuns sexualas. La gronda part da quests cas è vegnida sclerida. In lev augment hai er dà tar ils delicts cunter la libertad, quai che sa mussa cunzunt tar las smanatschas.
Ils incendis èn sa reducids da 106 ad 85 en cumparegliaziun cun l'onn precedent; 80 pertschient da quests incendis èn vegnids sclerids. En 14 (16) cas sa tractavi dad incendiaments.
Las cifras dal consum da narcotics e dal commerzi cun narcotics sa chattan en il rom dals onns precedents. En quest connex han ins registrà l'augment il pli evident tar il commerzi cun cannabis e tar il consum da heroin e da drogas sinteticas.

Violenza da giuvenils
Ina gruppa da lavur da la polizia chantunala dal Grischun e da la polizia da la citad da Cuira è s'occupada detagliadamain cun il fenomen da la violenza da giuvenils a Cuira. Tenor in rapport da questa gruppa da lavur èn vegnids registrads ils onns 2005 e 2006 tranter 111 e 136 eveniments ch'èn relevants per la polizia en connex cun in'eventuala violenza da giuvenils. In augment en cumparegliaziun cun l'onn precedent hai dà tar ils eveniments che vegnan valitads sco relevants per la polizia giudiziala.
Sco veritabels centers per excess da giuvenils sa mussan trais territoris da la citad da Cuira. D'ina vart è quai il quartier d'abitar Rheinau ch'è oravant tut pertutgà d'eveniments da la polizia da segirezza. Alura è la Bahnhofstrasse in segund punct neuralgic che ha medemamain oravant tut ina impurtanza per la polizia da segirezza. En il territori dal Welschdörfli la finala sa chatta il punct neuralgic il pli impurtant, e quai cunzunt er perquai ch'i dat qua savens acts chastiabels, en spezial violenzas e blessuras corporalas.
La statistica criminala e la statistica dals accidents da traffic 2006 po vegnir consultada detaglia- damain en l'internet sut www.kapo.ch.

Quelle: Kantonspolizei Graubünden