Durant in'emna èn manadras e manaders da chauns da tut l'Europa sa participads en il Grischun ad in seminari per scolar uschenumnads bloodhounds a chauns per tschertgar umans. Il bloodhound è enconuschì per ses nas fin incumparabel. La polizia e las forzas da salvament dovran quest chaun cun las ureglias lungas e cun la vusch sonora per tschertgar persunas sparidas u er per sclerir crims. La polizia chantunala dal Grischun e la "National Bloodhound Association of Switzerland" (NBAS) han infurmà il venderdi a Landquart davart la scolaziun da quests chauns da tschertga.

Da glindesdi fin venderdi han circa 40 participantas e participants da la Svizra, da la Germania, da l'Italia e da la Belgia trenà sut la direcziun d'instructurs da l'America. Sin il St. Luzisteig, en la citad da Cuira, dentant er si Brambrüesch han ils bloodhounds absolvì cun lur manadras e cun lur manaders ils exercizis ils pli differents, per exempel persequitar fastizs en fullas d'umans pli grondas, reprender puspè fastizs suenter pliras uras u suenter in viadi cun la pendiculara sin la muntogna da chasa da Cuira, collavurar cun auters teams da chauns e sa disar svelt a conturns ch'èn absolutamain esters. Quest curs han er frequentà bleras manadras e blers manaders da chagniels da mo circa tschintg mais. Cun quests chauns poi vegnir lavurà mo vi da fastizs curts.

En il deposit da pumpiers a Landquart ha orientà Robert Willi, vicecumandant da la polizia chantunala dal Grischun e schef da la gruppa da lavur "chauns" tar il concordat da polizia da la Svizra orientala, davart il seminari da scolaziun d'ina emna. Heinz Müller, manader da chauns tar la polizia chantunala dal Grischun, ha mussà cun ses bloodhound "Jerry-Lee", co ch'i vegn trenà cun questa razza. La "National Bloodhound Association of Switzerland" (NBAS) vegn presidiada da dr.med.vet. Marlene Zähner. Las commembras ed ils commembers da la NBAS, che derivan per gronda part da corps da polizia e da servetschs da salvament naziunals e da l'exteriur, vegnan scolads d'instructurs cun experientscha en trenaments emnils ed en seminaris annuals.

A la staziun a Landquart han quests chauns detecturs cumprovà lur nas fin a chaschun da divers exercizis. Las abilitads spezialas dals bloodhounds èn gia vegnidas duvradas pliras giadas da la polizia chantunala dal Grischun per tschertgar cun success persunas sparidas.

Quelle: Polizia chantunala dal Grischun