Gievgia, ils 26 da november 2009, sa participescha la polizia chantunala dal Grischun per la terza giada al di naziunal da la glisch. Cun differentas acziuns che stattan sut il motto "glisch - vesaivladad - segirezza", vegnan las participantas ed ils participants da traffic fatgs attents, quant impurtant ch'igl è en il traffic sin via che pedunas e che peduns èn bain visibels e che la glisch dals vehichels a motor e dals vehichels a duas rodas funcziuna.

Cun controllas intenziunadas vegn la polizia da regiuns e da traffic ad examinar il funcziunament da l'illuminaziun e da l'equipament correct dad autos e da vehichels a duas rodas ed a sa drizzar directamain e persunalmain a las participantas ed als participants da traffic. Sut il motto "glisch - vesaivladad - segirezza" vegnan ellas ed els envidads da far pli sapientivamain attenziun a la vesaivladad en il traffic sin via. Per prevegnir ad accidents èsi numnadamain impurtant che persunas e che vehichels vegnian vesids baud. Blers accidents pudessan vegnir evitads, sche las manevras da franar e da guntgir vegnissan cumenzadas ad ura.

Las ciclistas ed ils ciclists èn spezialmain periclitads
La notg è la ristga d'in accident bler pli gronda ch'il di. Igl è evident ch'il vesair e ch'il vegnir vesì èn gist l'enviern - pervia da la stgirezza che dura pli ditg e pervia da las relaziuns meteorologicas - spezialmain impurtants. Pervia da lur siluetta graschla èn velos mal perceptibels la notg e perquai er suttamess ad ina gronda ristga d'accidents. Per quest motiv èsi fitg impurtant per els, ch'i vegnian respectadas e resguardadas las suandantas prescripziuns: Sin far notg, la notg e sche l'aura pretenda er il di ston velos esser illuminads cun ina glisch alva vers enavant e cun ina glisch cotschna vers enavos. Ultra da quai vegnan prescrits reflecturs - davant alvs e davos cotschens - sco er dus pedals glischants.

Las mesiras da segirezza èn simplas da realisar
Ina participanta u in participant da traffic - latiers tutgan er las pedunas ed ils peduns - na sto betg mo vesair, mabain er vegnir vesì. Vesaivladad porta numnadamain dapli segirezza! La polizia chantunala dal Grischun appellescha perquai oravant tut a las pedunas ed als peduns, dentant er a ciclistas ed a ciclists sco er a manischunzas ed a manischunzs da mopeds, da purtar vestgadira clera u materials reflectants la notg u sin far notg. In avantatg da las mesiras da segirezza è ch'ellas pon vegnir realisadas en moda simpla. Tut las participantas e tut ils participants da traffic, sin rodas u a pe, giuvnas u giuvens, veglias u vegls pon, cun in sforz minimal, prestar lur contribuziun ad in augment da la vesaivladad ed uschia gidar ad augmentar l'atgna segirezza sco er tala da las autras participantas e dals auters participants da traffic.

Glista da controlla: Vegnir vesì e vesair bain! per pedunas e per peduns - purtar vestgadira clera - equipar la vestgadira cun material reflectant - esser vesaivel enturn ed enturn (360°) per ciclistas e per ciclists - montar reflecturs obligatorics (davant alvs, davos cotschens) - pedals glischants - reflecturs sin ils radis da la roda - controllar la glisch, avant che sa metter en moviment per manischunzas e per manischunzs da mopeds - adattar il cumportament da charrar a la visibilitad ed a las cundiziuns meteorologicas - nettegiar las fanestras davant e davos sco er las glischs dal vehichel - adina puspè controllar, sche tut las glischs funcziunan - charrar er il di cun glisch

Vestgadira clera u materials reflectants: glisch dat segirezza en il traffic sin via