Il favrer 2009 ha il cussegl grond acceptà il rapport da polizia 2010 ed uschia approvà la creaziun d'in servetsch da giuvenils tar la polizia chantunala dal Grischun. Dapi in mais tracta ina gruppa investigativa supplementara da l'investigaziun Cuira il tema "criminalitad da giuvenils". En il rom da la preschentaziun da la statistica criminala e da la statistica d'accidents da traffic èn las medias vegnidas infurmadas davart il nov servetsch da giuvenils da la polizia chantunala dal Grischun.

Areguard l'organisaziun è il servetsch da giuvenils suttamess a l'investigaziun Cuira, ina partiziun da la polizia chantunala. Sut la direcziun d'Armin Sigron, schef da l'investigaziun Cuira, elavureschan actualmain duas ed a partir da l'onn proxim trais persunas en moda centrala cas da violenza sco er da criminalitad da giuvenils en il chantun Grischun. Geograficamain lavuran quellas primarmain en la regiun da Cuira sco er en las regiuns vischinas ed en las regiuns d'apport tranter Landquart, Tusaun e Glion. Quai è la consequenza da la concentraziun la pli gronda da cas da violenza e da criminalitad da giuvenils en la regiun da Cuira. Il servetsch da giuvenils ha dentant tuttina ina funcziun centrala per l'entir Grischun. El cusseglia ed accumpogna tut ils posts da polizia, elavurescha sez cas en l'entir chantun ed è en general il post da contact en tut las dumondas che pertutgan ils giuvenils.

Cumponenta repressiva en il center
En il carnet d'obligaziuns dal servetsch da giuvenils figureschan il pli sisum dus puncts, numnadamain la retschertga e l'investigaziun. Delinquentas e delinquents giuvenils duain vegnir identifitgads ed arrestads uschè svelt sco pussaivel. Er la procuraziun d'infurmaziuns è impurtanta. Quai vul dir ch'ins sto scuvrir reglas, usanzas, tendenzas e privels sco er registrar giuvenils ch'èn pronts d'utilisar violenza. Las collavuraturas ed ils collavuraturs dal servetsch da giuvenils vegnan ultra da quai er a far lavur da prevenziun sin via ed uschia a sa drizzar a quels giuvenils ch'èn potenzialmain pronts da disturbar u da commetter delicts. Tar il servetsch da giuvenils da la polizia chantunala vegn però a dominar la cumponenta repressiva, pia la percepziun da la funcziun da la persecuziun penala. Delinquentas e delinquents giuvenils duain vegnir arrestads uschè spert sco pussaivel e confruntads cun la stupiditad da lur cumportament. Ultra da quai duain ellas ed els star bun a lunga vista per quai ch'els han fatg. Ellas u els dovran clers signals ch'als permettan da sortir da la spirala negativa.

Statistica criminala da la polizia en nova furma
La statistica criminala da la polizia per l'onn 2009 è cumparida en nova furma. L'emprima giada vegn preschentada ina statistica criminala unitara per tut ils chantuns che permetta ina statistica per l'entira Svizra tenor criteris da registraziun e da valitaziun unitars. Cunquai ch'i sa tracta da l'emprim rapport annual en questa furma na pon betg vegnir fatgas cumparegliaziuns cun las cifras da l'onn precedent. En il Grischun è il dumber dals delicts cunter il cudesch penal - tenor interpretaziun - enturn il nivel dals onns precedents. Il medem vala per ils delicts da massa sco l'enguladitsch e l'enguladitsch cun infracziun. Il dumber dals delicts da violenza percunter è s'augmentà danovamain, fertant che quel dals delicts concernent narcotics furma la media.

9794 delicts …
L'onn 2009 èsi vegnì registrà en il chantun Grischun 9794 delicts. La part la pli gronda da quels delicts, ca. 83%, pertutgan il cudesch penal; 12% pertutgan la lescha da narcotics. En Svizra èn vegnids registrads 553'421 delicts cunter il cudesch penal; 8156 da quels delicts pertutgan il chantun Grischun. Ils delicts da facultad (71.3%) furman la part la pli gronda; i suondan ils delicts cunter la libertad (15.8%) ed ils delicts cunter il corp e cunter la vita (6.7%). La quota da scleriment totala da tut ils delicts en il Grischun correspunda a 32% ; uschia è il chantun cleramain sur la media svizra da 27.5%. Tranter las persunas inculpadas dattan ils umens tranter 18 e 30 onns spezialmain savens en egl a la polizia. Ils blers delicts cunter il cudesch penal sco er cunter la lescha da narcotics pertutgan questa gruppa da vegliadetgna. Igl exista ina part surproporziunalmain gronda da persunas inculpadas da l'exteriur, sch'ins cumpareglia cun il dumber da la populaziun.

... e 2442 accidents da traffic
En il chantun Grischun èn capitads totalmain 2442 accidents da traffic l'onn passà. Quai èn 109 accidents u 4.3% damain che l'onn precedent. Il dumber da las persunas ch'èn vegnidas blessadas en in accident da traffic è - cumpareglià cun l'onn precedent - sa reducì da 62 a 724. L'onn passà èn tut en tut mortas 13 persunas sin las vias grischunas (2008: 20), quai ch'è danovamain ina reducziun da 35% pertschient. 143 accidents, 13 damain che l'onn precedent, èn capitads sut l'influenza d'alcohol. Questa cifra n'è dentant betg considerablamain pli auta ch'ils 138 accidents da l'onn 2005, cur che las novas limitas da promils èn vegnidas introducidas. Er il dumber dals accidents mortals cun motos è sa reducì, da set a tschintg cas. Pertutgads èn stads senza excepziun manischunzas e manischunzs da motos cun passa 125 ccm. Il dumber da motociclistas e da motociclists blessads è s'augmentà da 12 a 149. Passa 80% dals accidents cun motos vegnan chaschunads tras atgna culpa. Sin il territori da la citad da Cuira èn capitads 362 accidents da traffic, 28 dapli che l'onn precedent. Il dumber da persunas blessadas è sa diminuì levamain (da 115 a 109). Fertant ch'i n'ha dà l'onn 2008 naginas victimas en connex cun accidents da traffic a Cuira, èn vegnidas blessadas mortalmain duas persunas l'onn passà.

Ina cumparegliaziun da plirs onns mussa il dumber il pli bass en l'istorgia
L'onn passà è capità en media mintga 3 ½ uras in accident da traffic en il chantun Grischun e mintga 12 uras è vegnida blessada ina persuna tar in accident. Anc adina han stuì vegnir registrads blers accidents da glischnar e blers accidents persunals. La mesadad da las persunas che han gì accidents mortals sto vegnir attribuida a questa categoria. La gronda part da las victimas tutgan tar las persunas da 20 fin 24 onns e tar quellas da 45 fin 49 onns. La finala stoi vegnir remartgà ch'i sa tracta - en quai che reguarda il dumber da las persunas blessadas e mortas cumpareglià sur plirs onns - dal dumber il pli bass en l'istorgia.

La statistica criminala da la polizia 2009 e la statistica dals accidents da traffic 2009 stattan a disposiziun en l'internet sin la pagina www.kapo.gr.ch (rubrica: documentaziun) en il format pdf.