La polizia chantunala dal Grischun ha ussa ina nova polizista e ventg novs polizists. Glindesdi avantmezdi èn els vegnids brevetads en in rom festiv en la sala dal cussegl grond a Cuira. Suenter ina scolaziun da basa d'in onn rinforzan els ussa il corp da polizia da l'entir chantun.
En ses pled ha Robert Willi, cumandant ad interim da la polizia chantunala dal Grischun, dà in sguard enavos sin l'ultim onn da scolaziun. El è stà cuntent che tut ils aspirants grischuns han reussì l'examen professiunal pretensius ed han survegnì l'attestat federal sco polizista e sco polizist. "Vus dastgais esser superbis da quest attestat", ha el renconuschì. Ina tala renconuschientscha n'è numnadamain betg ina chaussa che sa chapescha da sezza. A medem temp ha Willi en ses discurs er dà in sguard enavant ed ha mussà tge ch'i vul dir da far ina empermischun sin la bandiera da la polizia chantunala dal Grischun. Sco represchentants da la pussanza statala na stoppian ins betg mo proteger la libertad da las burgaisas e dals burgais che sa cumportan correctamain, mabain adina puspè er intervegnir en la libertad dal burgais. "Il fatg da limitar la libertad persunala pretenda in grond senn da responsabladad ed ina cumpetenza sociala expressiva", accentuescha el en quest connex.
La confidenza è ina basa impurtanta
Il tema "responsabladad" ha integrà er cussegliera guvernativa Barbara Janom Steiner en ses pled. La scheffa dal departament da giustia, segirezza e sanadad ha declerà che la basa da l'incumbensa da la polizia saja en emprima lingia la confidenza. Quella stoppian ins s'acquistar tras lavur correcta, dentant er tras transparenza e tras loialitad. "Vus avais tschernì ina professiun tut speziala ed a partir d'immediat essas Vus en il center da l'attenziun da la generalitad e da la publicitad", di ella ed accentuescha ch'i saja impurtant d'avair ina famiglia ed amis che dattan sustegn cur che las chargias daventan memia grondas. Sa basond sin l'ordinaziun da polizia dal chantun Grischun han la nova polizista ed ils novs polizists prestà l'empermischun sin la bandiera durant la festa ed han empermess d'observar la constituziun e las leschas, d'ademplir las obligaziuns tenor meglier savair e pudair e da proteger ils dretgs da las burgaisas e dals burgais. Sco ch'igl è tradiziun, è la festa da brevetaziun vegnida enramada da la musica da polizia dal Grischun.
In aspirant grischun survegn la meglra nota
Curdin Brändli, 21 onns, da Grüsch, ha terminà cun la nota 5.4 l'examen professiunal da polizist cun certificat professiunal federal. Ensemen cun in aspirant dal chantun Turgovia ha el fatg il megler resultat da tut las absolventas e da tut ils absolvents da la scola da polizia da la Svizra orientala da quest onn.
La nova polizista ed ils ventg novs polizists cun lur emprims lieus da staziunament:
Aeppli Marc, post da polizia da Glion
Barblan Gian Andri, post da polizia da Puschlav
Barbüda Andrin, post da polizia da Zernez
Blumenthal Pieder, post da polizia dad Arosa
Brändli Curdin Andrea, post da polizia da Scuol
Buchli Thomas, post da polizia da Schiers
Bürge Beat, post da polizia da Claustra
Greuter Ciril Florian, basa da la polizia da traffic da San Bernardin
Grosse Silvie, post da polizia da Glion
Hemmi Martin, basa da la polizia da traffic da San Bernardin
Jost Simon, post da polizia da Mustér
Kurath Fabian, post da polizia da Scuol
Lipp Ken, basa da la polizia da traffic da San Bernardin
Maridor Patrick, post da poliza da Casti
Monsch Michael, post da polizia da Schiers
Pedrotti Matteo, post da polizia da San Murezzan
Perito Fabrizio, basa da la polizia da traffic da San Bernardin
Robbi Flurin, post da polizia dad Arosa
Schett Ronny Andreas, basa da la polizia da traffic da Silvaplauna
Stupan Enrico, post da polizia da Puschlav
Vinante Enrico, post da polizia da Tusaun
