La polizia chantunala dal Grischun e la polizia da la citad da Cuira han terminà cun success la campagna da prevenziun "Distratg – e la mort t'accumpogna". Dapi il cumenzament da la campagna avant 1 mais èn passa 2000 manischunzas e manischunzs vegnids rendids attents als privels che resultan da la distracziun e da l'inattenziun al guvernagl.
 
Ultra da differents meds da communicaziun sco placats, flyers e spots da radio han ils corps da polizia en il Grischun controllà – durant las ultimas 4 emnas – pli savens ed en moda sistematica il traffic en l'entir chantun. Igl èn vegnids controllads var 12'000 vehichels. 2016 persunas èn vegnidas retegnidas ed infurmadas davart il fatg ch'i n'è betg mo privlus da telefonar u da programmar l'apparat da navigaziun durant ch'ins maina in vehichel, mabain che quai è er scumandà tenor la lescha federala davart il traffic sin via. En 652 cas ha stuì vegnir pronunziada ina multa disciplinara. La gronda part da quests cas (490) pertutgavan il telefonar al guvernagl, il scriver SMS (99) ed il betg franar avant la strivla melna (30).

Er tgi che mangia, è distratg
Persunas che mangian u baivan al guvernagl, guardond da betg far flatgs u tacs, èn medemamain distratgas. Er ellas na vesan betg, tge che capita davant ellas sin via, e dovran dapli temp, fin ch'ellas han en maun il guvernagl uschia ch'ellas pon puspè manischar en moda precisa. Il medem vala per leger gasettas u chartas stradalas. Durant la campagna da prevenziun han stuì vegnir chastiadas 22 persunas che legevan u mangiavan al guvernagl. Tranter quellas er plirs manischunzs da camiuns che legevan ils documents da vitgira per s'infurmar davart il proxim lieu da stgargiar.

La mort t'accumpogna vinavant
Cumbain che la campagna da prevenziun è ussa terminada, resta la "distracziun en il traffic sin via" er vinavant in tema actual. L'inattenziun al guvernagl è la raschun da mintga terz accident da traffic en il chantun Grischun. Ultra da la sveltezza betg adequata e da l'alcohol al guvernagl èn il telefonar ed il programmar apparats da navigaziun motivs principals per accidents da traffic sin nossas vias. Perquai vala er en l'avegnir: Tgi ch'è distratg e maina in vehichel, ristga che la mort l'accumpognia – gist uschia sco ch'ils placats da la campagna l'han mussà simbolicamain cun la figura vestgida en nair che tegna en maun ina fautsch. Pli segir èsi da retegnair il vehichel sin la proxima guntgida e da telefonar là u da programmar là il radio u l'apparat da navigaziun. Tant la polizia chantunala dal Grischun sco er la polizia da la citad da Cuira vegnan a far vinavant controllas en quest sectur.

Ulteriuras infurmaziuns davart la campagna chattais Vus en l'internet sut www.lenken-statt-ablenken.ch