En il chantun Grischun èn vegnids registrads statisticamain en tut 10'494 delicts l'onn 2010. Quai èn 700 delicts dapli che l'onn precedent. Il pli grond augment hai dà tar ils delicts concernent ils narcotics (15,1 %, plus 3,1 %). Ils delicts cunter il cudesch penal èn dentant sa reducids per 2,7 % (dad 83 % sin 80,3 %). Questas cifras sa chattan en la statistica svizra criminala da la polizia ch'è vegnida publitgada il glindesdi per la segunda giada en nova furma.

Dals totalmain 10'494 delicts ch'èn vegnids registrads en il Grischun, tutgan 8'427 (2009: 8'156) a delicts cunter il cudesch penal. Lunschor la pli gronda part da quai èn, cun 72,8 % (71,3 %), ils delicts da facultad. 15,1 % (15,8 %) pertutgan delicts cunter la libertad e 6,5 % (6,7 %) delicts cunter il corp e cunter la vita. La quota totala da scleriment dals delicts cunter il cudesch penal en il Grischun correspunda a 31,9 % (32 %).

Ils delicts da violenza restan stabils
Ils blers delicts da violenza èn vegnids registrads tar las blessuras corporalas simplas, tar acts da violenza, tar baruffas, tar attatgas, tar sforz sco er tar la violenza e tar smanatschas cunter autoritads sco er cunter funcziunarias e cunter funcziunaris. Il dumber da grevs delicts da violenza (delicts da mazzament, blessuras corporalas grevas, violaziuns) è s'augmentà da 21 l'onn 2009 (2,7 %) sin 35 l'onn 2010 (4,5 %). Da tut ils delicts da violenza han 89,7 % (91 %) pudì vegnir sclerids, tar ils grevs delicts è la quota da scleriment tar 57,1 % (67 %). Il dumber da cas da violenza a chasa è sa reducì da 218 l'onn 2009 sin 187 l'onn 2010. 

Augment tar ils delicts concernent ils narcotics
L'onn passà en vegnids registrads 1'589 (1'218) cuntravenziuns cunter la lescha da narcotics. Cun 57,9 % (59,7 %) appartegna la pli gronda part al consum illegal da narcotics. Il commerzi ha pertutgà per 38,5 % (46 %) ils products da chonv, per 33,1 % (29,2 %) il cocain e per 9,5 % (12,4 %) il heroin.

L'aglomeraziun da Cuira mussa la pli gronda chargia
Ils delicts vegnan er evaluads geograficamain. Latiers vegn eruì il dumber da frequenza (dumber da delicts sin 1'000 abitantas ed abitants). Tar ils delicts cunter il cudesch penal resulta per il chantun Grischun il dumber da frequenza da 43,9 (42,8), per delicts cunter la lescha da narcotics dad 8,3 (6,4). Entaifer il chantun mussa la regiun da Cuera en omadus secturs la chargia la pli gronda, fertant che las grevezzas las pli pitschnas sa chattan en Surselva (cudesch penal svizzer) ed en la regiun "Rain" da Landquart fin a Tusaun (narcotics). Tranter las persunas inculpadas dattan ils umens tranter 15 e 30 onns spezialmain savens en egl a la polizia.

Per la segunda giada ina registraziun unitara
La statistica criminala da la polizia è vegnida introducida avant in onn ed ha remplazzà las statisticas chantunalas. Cun la segunda ediziun en nova furma èsi per l'emprima giada pussaivel da cumparegliar unitarmain ils differents onns. Sin fundament da la perioda curta èn interpretaziuns areguard tendenzas pussaivlas mo limitadamain. La statistica svizra cumpletta po vegnir chargiada giu da la pagina d'internet da l'uffizi federal da statistica sut www.bfs.admin.ch, la statistica dal Grischun stat a disposiziun sco PDF sut www.kapo.gr.ch.