Per blers uffants dal Grischun cumenza glindesdi, ils 15, u glindesdi, ils 22 d'avust 2011, ina nova fasa da la vita. Els van per l'emprima giada a scolina u a scola e fan perquai experientschas dal tuttafatg novas. La polizia chantunala dal Grischun sco er la polizia da la citad da Cuira e la CMP lantschan puspè in'acziun communabla per il cumenzament da la scola. En l'entir chantun vegnan repartidas l'emprim di da scola chapitschas cotschnas a las scolarinas ed als scolarins da l'emprima classa. Questas chapitschas cun pala dattan en egl en il traffic sin via ed attiran l'attenziun da las automobilistas e dals automobilists. Uschia duai vegnir cuntanschì che las automobilistas ed ils automobilists vesian puspè pli spert ils uffants suenter las vacanzas da stad.

La via da scola ha ina plazza impurtanta en la vita d'in uffant da scola. Ella dat la pussaivladad da sa scuntrar cun uffants da la medema vegliadetgna, gida a sviluppar las abilitads socialas e serva a promover il moviment. Anc adina èsi impurtant ch'ils geniturs giajan– gia avant il cumenzament da l'emprim onn da scola – ensemen cun lur uffant la via da scola. Uschia emprendan ils pitschens ad enconuscher la via ed èn prest uschè independents ch'els la pon far senza accumpagnament. In'attenziun speziala sto vegnir dada al fatg, che la via la pli curta n'è betg adina la meglra. Amplas e strivlas melnas ston ins duvrar adina cur che quai fa da basegn. Igl è er bun, sch'ins declera a l'uffant ils privels ed ils signals da traffic ch'èn per via.

„Fermar adina dal tuttafatg!“ Quai è la devisa da la campagna da quest onn
Avant las strivlas melnas stuessan las automobilistas ed ils automobilists adina fermar dal tuttafatg, sch'in uffant vul traversar la via u sa chatta gia sin quella. En l'instrucziun da traffic emprendan ils uffants da traversar las strivlas melnas pir cura ch'in vehichel è sa fermà. Far segns cun il maun ad in uffant è privlus, perquai che l'uffant pudess cumenzar a currer senza guardar sin auters privels, sco per exempel sin il traffic en direcziun cuntraria. Igl è er da considerar ch'ils uffants dovran temp per traversar la via. In uffant dovra l'emprima giada fin diesch secundas per sa decider. Bainbaud – cun la confidenza necessaria – sa reducescha il temp da decisiun considerablamain.

Dapli controllas da la polizia en ils conturns da chasas da scola
Las emprimas emnas vegnan las collavuraturas ed ils collavuraturs da la polizia chantunala dal Grischun a survegliar dapli las vias da scola ed a controllar pli savens la sveltezza en ils conturns da las chasas da scola.