La polizia chantunala dal Grischun lantscha a la GEHLA la nova campagna per la segirezza dal traffic
L'onn passà èn capitads 410 accidents da traffic sin las vias grischunas pervia d'ina sveltezza betg adequata. La polizia chantunala dal Grischun ha la finamira da reducir per in terz quests accidents sco er las privaziuns dal permiss dad ir cun auto causa la sveltezza. La nova campagna per la segirezza dal traffic "From Hero to Zero! Giu dal gas." vegn preschentada a la populaziun per l'emprima giada a la messa d'atun grischuna GEHLA da quest onn.
Tgi che va memia svelt, sa senta l'emprim forsa sco in erox. Ma, sch'i dat in accident, è el tuttenina in pover verm. El sto dar giu ses permiss da manischar, ha eventualmain sez subì in donn corporal u sto – en cas d'ina procedura da regress – pajar onns a la lunga ils custs da tractament d'autras victimas da l'accident. En il mender cas sto el schizunt ir en praschun. Cun placats per lung dals trajects, sin ils quals i vegn charrà per part massivamain memia svelt, sco er cun ina broschura d'infurmaziun renda la polizia chantunala dal Grischun en collavuraziun cun l'uffizi chantunal da construcziun bassa attent a partir dal settember a las consequenzas, cun las qualas ins sto far quint, sch'ins charrescha memia svelt.
La GEHLA sco plattafurma d'infurmaziun
La nova campagna ch'è vegnida sviluppada ensemen cun l'agentura da reclama Clus da Cuira porta il titel "From Hero to Zero! Giu dal gas." e mussa uschia questa midada da l'erox al pover verm en ina moda impressiunanta cun il gieu da pleds dal text. Per lantschar questa campagna è vegnida tschernida la GEHLA da quest onn. La è la polizia chantunala dal Grischun preschenta cun in'exposiziun speziala. La cumparsa da la polizia da traffic è perquai er deditgada cumplainamain a la nova campagna. Vi d'in simulatur pon las visitadras ed ils visitaders far in test da lur atgna capacitad da reagir. Preschentads vegnan ils apparats da radar actuals per mesirar la sveltezza e tgi che vul po sa laschar fotografar sin ina moto da la polizia. La finamira da la campagna e da la cumparsa a la fiera è quella da persvader las automobilistas ed ils automobilists d'adattar lur sveltezza a la situaziun ed a las cundiziuns sin via e da sa cumportar cun resguard e cun precauziun en il traffic sin via. La broschura d'infurmaziun dat buns tips latiers.
Prevenziun e la professiun da polizista u da polizist
Ultra da la polizia da traffic vegnan er ad esser preschents a la GEHLA il post spezialisà per la prevenziun, l'instrucziun e la polizia da segirezza. Il post spezialisà per la prevenziun infurmescha davart la segirezza en l'internet e mussa, co ch'ins sa cumporta correctamain en ils uschenumnads "chats" ed en las raits socialas sco Facebook. Plinavant vegn mussà ad in bancomat preparà, co che cugliunaders emprovan da survegnir las datas da la clientella d'ina banca. Tar l'instrucziun vegn mussà a persunas interessadas, tge ch'i dovra per daventar sezza polizista u sez polizist e tge via ch'ins sto prender per realisar quest giavisch. La finala mussa la polizia da segirezza, tge pussaivladads da sa spezialisar ch'i dat tar la polizia – dals grenadiers sur ils manaders d'acziun sgulants en helicopters fin als manaders dal chaun. A represchentaziuns ora al liber mesemna e sonda saira mintgamai a las 18.00 vegnì mussà, tge che questas forzas spezialas da la polizia chantunala dal Grischun san e nua ch'ellas entran en acziun.
Giudair senza alcohol
Ch'ins po giudair la sortida er senza alcohol, vegn mussà a la bar da coctails da la polizia chantunala. En collavuraziun cun la "Blue Cocktail Bar", in project da la Crusch blaua, porscha la polizia chantunala dal Grischun a las visitadras ed als visitaders da la GEHLA tschintg differents coctails che gustan bain, ma che na cuntegnan nagin alcohol. Uschia èsi procurà ch'ins po er turnar a chasa cun l'auto senza problems suenter esser stà a la GEHLA.
