Actualmain curseschan en Svizra ed er en il Grischun e-mails fraudulents d'uschenumnads instituts bancars che vulan surmanar las retschavidras ed ils retschaviders d'inditgar lur numers da conto e da telefon. Suenter survegnan ellas ed els in clom da telefon e – sut la pretensiun da vulair meglierar la segirezza dal sistem – vegnan ellas ed els intimads d'inditgar il pled-clav da lur e-banking ed ulteriurs elements da segirezza. Ils engianaders pon uschia avrir il conto da las retschavidras e dals retschaviders.

Per svegliar ina fidanza uschè gronda sco pussaivel utiliseschan ils engianaders adressas d'e-mail d'instituts finanziars enconuschents. Els pretendan ch'i saja vegnì installà in nov sistem da segirezza per proteger il conto d'e-banking. Per terminar il process vegnia in collavuratur da banca presumptiv ad entrar en contact per telefon cun las retschavidras e cun ils retschaviders.
 
Mesiras simplas per sa proteger en moda effizienta
Per sa proteger cunter tals e-mails fraudulents en moda effizienta recumonda la centrala d'annunzia e d'analisa per la segirezza da l'infurmaziun (MELANI) da la confederaziun da resguardar il suandant cumportament: 

• Betg inditgar datas persunalas, sch'ins vegn envidà per e-mail da far quai, mabain simplamain stizzar l'e-mail.
• Terminar immediat telefonats, en ils quals ins vegn dumandà d'inditgar pleds-clav, datas da la carta da credit u autras infurmaziuns persunalas.
• Mai sa fidar d'e-mails ch'ins ha survegnì senza vegnir intimà. Er betg, sch'ils e-mails arrivan da presumtivs spediturs fidads.
• Sch'ins ha tuttina inditgà pleds-clav, datas da cartas da credit u chaussas sumegliantas, duain ins urgentamain contactar immediat la hotline da l'e-banking da la banca respectiva.

Ulteriuras infurmaziuns davart il tema pon er vegnir consultadas sut www.melani.admin.ch.