A partir d'immediat ha la polizia chantunala dal Grischun duas novas polizistas ed indesch novs polizists. Venderdi avantmezdi èn ellas ed els vegnids brevetads en in rom festiv en la sala dal cussegl grond a Cuira. Suenter la scolaziun da basa rinforzan ellas ed els ussa il corp da polizia chantunal.
Las duas dunnas ed ils indesch umens han absolvì durant in onn la scola da polizia ad Amriswil (TG) ed èn gia stadas e stads activs – en il rom d'in praticum – durant intginas emnas en il chantun Grischun. A partir dal 1. d'october 2013 fan ellas ed els ussa uffizialmain part da la polizia chantunala dal Grischun – cun tut ils dretgs e cun tut las obligaziuns ch'il servetsch da polizia cuntegna. Las empermischuns correspundentas sin la bandiera dal Grischun han ellas ed els fatg durant la festa da brevetaziun. Il cumandant da la polizia chantunala dal Grischun, colonel Walter Schlegel, ha exprimì cleras aspectativas envers sias novas collavuraturas e ses novs collavuraturs: "Da Vus vegni spetgà che Vus demussias ina buna tenuta er en situaziuns difficilas, che Vus reageschias en moda sincera e persvadenta e che Vus sajas autentics. Voss agir e Vossa demananza caracteriseschan il maletg da nossa polizia en moda decisiva."
La polizia sto esser in exempel
Ultra da las confamigliaras e dals confamigliars da las persunas brevetadas èn sa participads er numerus represchentants da la politica e da l'administraziun sco er d'organisaziuns partenarias a la festa da brevetaziun. L'entir corp da polizia stoppia adina esser conscient ch'el represchentia il chantun e ch'el haja pia ina funcziun d'exempel, ha ditg Schlegel en sia allocuziun als giasts. Er cusseglier guvernativ Christian Rathgeb ha drizzà il pled a las preschentas ed als preschents. Il schef dal departament da giustia, segirezza e sanadad ha engrazià a tut las polizistas ed a tut ils polizists per lur grond engaschament a favur da la populaziun dal Grischun sco er dals giasts ed ha giavischà a las novas collavuraturas ed als novs collavuraturs in bun cumenzament en lur emprim lieu da staziunament. Il directur da la polizia ha explitgà plinavant che la birocrazia che s'augmenta generalmain en l'administraziun stoppia vegnir cumbattida er tar la polizia chantunala. Per quest intent stoppian vegnir applitgads pli sistematicamain e cun dapli curaschi ils meds auxiliars electronics. Rathgeb ha pretendì ultra da quai che las activitads da mintga polizista e da mintga polizist vegnian transferidas sensiblamain dal biro a la front. La festa da brevetaziun è vegnida enramada musicalmain – sco ch'igl è tradiziun – da la musica da la polizia dal Grischun.
Las novas collavuraturas ed ils novs collavuraturs e lur emprim lieu da staziunament a partir dal 1. d'october 2013
- Bernhard David-Reto, post da polizia Martina
- Düblin Markus, post da polizia San Murezzan
- Feltscher Marc, basa da la polizia da traffic San Bernardino
- Fraefel Stephan, post da polizia Schiers
- Henny Franziska, post da polizia Silvaplauna
- Luck Stefan, post da polizia San Murezzan
- Marugg Tobias, post da polizia Puschlav
- Platz Nadine, post da polizia Tavau
- Poltéra Orlando, basa da la polizia da traffic San Bernardino
- Rechsteiner Martin, post da polizia Samedan
- Tscharner Matthias, basa da la polizia da traffic Silvaplauna
- Zanin Yves, post da polizia Lai
- Zanolari Luigi, basa da la polizia da traffic San Bernardino
