Glindesdi da questa emna è puspè vegnida lantschada la campagna da la polizia "Suspect – dai in telefon!" cunter laders. Las burgaisas ed ils burgais vegnan appellads d'annunziar immediatamain a la polizia, sch'els fan constataziuns suspectusas. La preschientscha da la polizia vegn bain augmentada regularmain durant la stagiun stgira. Tuttina dependa la polizia da l'agid da la populaziun.

La finamira da la polizia e quella da reducir il dumber da las infracziuns. Ensemen cun plirs auters corps da polizia sa participescha pia la polizia chantunala dal Grischun a la campagna. Objects betg illuminads u che paran bandunads vegnan preferids dals laders. Perquai recumonda la polizia da s'equipar cun meds d'agid tecnics sco per exempel sensurs da moviments u uras automaticas. Sche abitantas u abitants avessan da tschiffar ina giada in lader sin il fatg, recumonda la polizia da betg sa metter cunter talas persunas. Tgi che observa ina infracziun, duai clamar immediatamain la polizia e betg empruvar da fugentar il lader.

L'agid da buna vischinanza è in fitg bun med
Persunas che s'accordan cun lur vischins e ch'èn attentas durant l'absenza da l'auter sminueschan il privel d'ina infracziun.
Las abitantas ed ils abitants d'in quartier che san distinguer persunas u vehichels suspectus per il pli svelt dals abitants dal quartier duessan annunziar il suspect adina directamain sur il numer d'urgenza 117. L'examinaziun da talas annunzias vegn fatga da la polizia. Quai maina bleras giadas a success impurtants.
Material d'infurmaziun e cussegls per Vossa segirezza chattais Vus en l'internet sut: www.kapo.gr.ch u sut www.skppsc.ch.  Broschuras davart il tema As stattan a disposiziun sin mintga staziun da polizia u pudais Vus empustar gratuitamain tar il post spezialisà "prevenziun" da la polizia chantunala dal Grischun (praevention@kapo.gr.ch .