Glindesdi avantmezdi ha la polizia chantunala dal Grischun preschentà a Cuira la statistica criminala da la polizia 2014 a chaschun d'ina conferenza da medias. La situaziun dal total dals delicts mussa en tut ina tendenza regressiva. En il Grischun datti però differenzas tranter las regiuns ch'èn pertutgadas da delicts.
En il chantun Grischun èn vegnids registrads l'onn passà 10 085 delicts. Quai èn 252 damain che l'onn 2013. La part la pli gronda èn acts chastiabels cunter il cudesch penal svizzer, numnadamain 8196 (onn precedent 8183). Tar ils delicts da violenza grevs è vegnì registrà in augment da 21 cas envers l'onn precedent (da 18 sin 39). En ils ravugls famigliars hai dà 200 cas da violenza a chasa (onn precedent 179). In pitschen regress hai dà tar las blessuras corporalas simplas. L'onn 2014 èn vegnids registrads 126 cas (onn precedent 162). Da las persunas inculpadas dattan ils umens tranter 20 e 30 onns sco er tranter 40 e 49 onns spezialmain savens en egl a la polizia.
Buna quota da scleriment
Il grad da criminalitad en il Grischun è pli aut en las regiuns da Cuira e dal Mesauc. Tar la categoria dals enguladitschs cun infracziun han pliras serias pudì vegnir scleridas, tranter quellas cas da pli baud. La quota da scleriment en quest sectur importa buns 27,7 % (onn precedent 21,2 %). "L'enguladitsch cun infracziun vala sco delict da massa ch'è collià cun in'energia criminala considerabla", ha declerà Gianfranco Albertini, schef da la polizia criminala dal Grischun ed ha punctuà che questa categoria da delicts pretendia fitg blera lavur da retschertga e d'inquisiziun. Da tut ils acts chastiabels cunter il cudesch penal svizzer ha la polizia chantunala dal Grischun sclerì 34,6 % (onn precedent 31,4 %). Tar ils delicts cunter il corp e cunter la vita sa chatta la quota da scleriment tar 93,1 % (onn precedent 92,7 %).
La polizia chantunala reagescha sin la situaziun dals enguladitschs cun infracziun
Ils enguladitschs cun infracziun per lung da las axas da transit e mintgatant en la periferia han chaschunà ina chargia considerabla e laschà daventar malsegira la populaziun. La polizia chantunala dal Grischun ha reagì cleramain sin la situaziun d'enguladitschs cun infracziun agravada. "Las parts impurtantas èn stadas d'ina vart l'augment dal squitsch da controlla tras in augment da la preschientscha da la polizia e da las stentas generalas da retschertga en las regiuns, da l'autra vart l'intensivaziun da las activitads d'investigaziun da la polizia criminala", ha ditg Walter Schlegel, cumandant da la polizia chantunala dal Grischun, a las medias. Il success da l'onn passà haja mussà en tge direcziun che las stentas da la polizia hajan dad ir en il futur. "Grazia al rinforzament tar il dumber da persunal ils proxims 2 onns vegnin nus ad esser meglier en cas da tschentar punctualmain accents", ha confermà Walter Schlegel.
Incumbensa per tut la societad
Il dumber da delicts na po betg vegnir controllà sulettamain da la polizia. Quai è ina incumbensa per tut la societad che na po betg mo vegnir ademplida da la politica, da la giustia e da la polizia. Gist en cas dals enguladitschs cun infracziun po la populaziun dar a la polizia indicaziuns d'investigaziun. Tenor Gianfranco Albertini dastgan la populaziun e la polizia bain sa vesair sco unitad, sch'i sa tracta da sclerir delicts. Il schef da la polizia criminala ha appellà a las burgaisas ed als burgais d'avair curaschi civil, quai vul dir d'esser alerts e d'annunziar directamain a la polizia, sch'i capita insatge dubius.
Per in access direct stat la statistica criminala da la polizia 2014 a disposiziun sut
www.kapo.gr.ch.