Glindesdi avantmezdi ha la polizia chantunala dal Grischun preschentà a Cuira la statistica criminala da la polizia 2015 a chaschun d'ina conferenza da medias. La situaziun dal total dals delicts mussa en tut ina tendenza regressiva.

En il chantun Grischun èn vegnids registrads l'onn passà 9448 delicts. Quai èn 637 damain che l'onn 2014. Plinavant vegnan ils blers delicts commess en il sectur dal cudesch penal svizzer, numnadamain 75,0 % (2014: 81,3 %) da tut ils delicts. Sa diminuì è cunzunt il dumber da delicts da facultad (minus 19 %) e da delicts cunter la libertad (minus 12 %). Logicamain han il territori da Cuira e sias aglomeraziuns la chargia la pli gronda. Ultra da quai èn las vals dal sid e l'Engiadina pertutgadas surproporziunalmain, almain levamain. Las denunzias per cuntravenziun cunter la lescha da narcotics èn s'augmentadas sin 1614 (onn precedent: 1276).

Savens èn las persunas inculpadas masculinas
Las persunas inculpadas èn per il solit persunas tranter 20 e 29 onns. Entaifer questa classa da vegliadetgna èn 84,5 % da las persunas inculpadas umens. 45,8 % dal total da las persunas inculpadas èn persunas estras. Radund la mesadad da quellas viva permanentamain en Svizra.

La quota da scleriment è s'augmentada
La quota totala da scleriment en l'entir chantun importa 36,6 % (plus 2 %). Per ils delicts cunter il corp e cunter la vita sco er cunter l'integritad sexuala surpassa quella schizunt 90 %. En cas da delicts da facultad èn savens avant maun mo paucs indizis. Ultra da quai chaschunan quels delicts scleriments che dovran bler temp e ch'èn cumbinads cun gronds custs. La quota da scleriment tar quels delicts importa 23,2 %, analogamain a l'onn precedent.

Semperverds: enguladitsch cun infracziun e ladernitsch clandestin
"L'enguladitsch cun infracziun ed il ladernitsch clandestin valan sco delicts da massa ch'èn cumbinads cun in'energia criminala considerabla", ha declerà Gianfranco Albertini, il schef da la polizia criminala dal Grischun. "Questa categoria da delicts pretenda bler da l'investigaziun", ha agiuntà Albertini.

Il rinforzament persunal fa effect
Er grazia al rinforzament persunal ch'è gia vegnì communitgà il cumenzament da l'onn 2015 e per part realisà en il fratemp, ha il svilup dals enguladitschs cun infracziun e dals ladernitschs clandestins pudì vegnir influenzà en il senn positiv. Las stentas da la polizia cun augmentar la controlla e la preschientscha da la polizia pudessan avair contribuì al svilup favuraivel.

Tuts pon cooperar
Igl è ina incumbensa da l'entira societad da tegnair il dumber da delicts usché bass sco pussaivel. La populaziun po bain prestar ina gronda contribuziun a favur d'in svilup favuraivel per exempel dal dumber d'infracziuns. "Per nus tuts vali da metter fin a la criminalitad", ha ditg Gianfranco Albertini. "La polizia na po betg remplazzar la burgaisa u il burgais, en spezial betg quella u quel cun curaschi civil. Las burgaisas, ils burgais e la polizia dastgan ruassaivlamain sa chapir sco unitad collectiva, nua ch'i sa tracta d'impedir delicts", ha Albertini ditg sco finiziun.