Sin las vias grischunas han 18 persunas pers lur vita l'onn 2015 tras accidents da traffic. Quai èn 2 dapli che l'onn precedent. 633 persunas èn vegnidas blessadas tar accidents da traffic. Cumpareglià cun l'onn precedent è quai ina reducziun da 46 persunas ed è il medem mument la cifra la pli bassa dapi l'onn 1959. Quai mussa la statistica d'accidents actuala da l'uffizi federal da vias (UVIAS).

Il dumber da persunas che han gì in accident mortal sin las vias grischunas è s'augmentà l'onn 2015 per 13 % envers l'onn precedent. Ina reducziun po percunter vegnir constatada tar quellas persunas ch'èn vegnidas blessadas tar in accident (-7 %). Il dumber total da 633 persunas è vegnì sutpassà en il chantun Grischun l'ultima giada l'onn 1959. Quella giada importava l'effectiv da vehichels main ch'in dieschavel da quel dad oz (2015: 152 688; 1958: 13 283). Sco punct positiv poi vegnir remartgà che main motociclistas e motociclists han pers lur vita che l'onn 2014 (-29 %) e che nagina ciclista u ciclist ha gì in accident mortal. Percunter è il dumber da persunas grevamain blessadas creschì per 25 %.

Main pedunas e peduns blessads
Entant ch'i ha pudì vegnir constatada ina reducziun da quasi 20 % tar il dumber da pedunas e peduns blessads envers l'onn precedent (da 42 a 34), ston er quest onn vegnir cumprovads dus cas mortals. In terz dals accidents cun pedunas e peduns capita sin las strivlas melnas.

Augment tar las ciclistas ed ils ciclists blessads cun velos electrics
Cumpareglià cun l'onn precedent è il dumber da ciclistas e ciclists che han pers lur vita en in accident sa reducì per 2. El è percunter s'augmentà per 1 tar las ciclistas ed ils ciclists da velos electrics. La medema tendenza è percorschibla tar las ciclistas ed ils ciclists blessads. Uschia èn vegnids blessads l'onn 2015 tar in accident da traffic 51 ciclistas e ciclists (-29 %) e 10 ciclistas e ciclists cun velos electrics (+100 %).

Regress tar ils accidents da moto mortals
Legraivel è il fatg ch'in regress ha pudì vegnir constatà tant tar ils accidents mortals da motociclistas e motociclists (-29 %) sco er tar ils accidents cun motociclistas e motociclists blessads (-8 %). Il dumber d'accidents da moto sa chatta sin il nivel da l'onn precedent (161).

Augment dals accidents chaschunads sut influenza da narcotics e da medicaments
Cun 305 accidents è ina sveltezza memia auta la raschun la pli frequenta per in accident. Sco punct positiv poi vegnir remartgà en quest connex che quai è in regress da 13 % envers l'onn precedent. Tar 122 accidents èn l'inattenziun e la distracziun stadas il motiv per l'accident. Praticamain identic sco l'onn precedent è il dumber d'accidents ch'èn vegnids chaschunads sut influenza d'alcohol (111). Percunter sto vegnir constatà in augment tar ils accidents, nua che la manischunza u il manischunz era sut influenza da narcotics e da medicaments (+39 %).

Las vias principalas èn puspè a la testa
Ils accidents sin autostradas sa diminueschan dapi l'onn 2012. La posiziun a la testa vegn occupada – sco gia l'onn precedent – da las vias principalas (1258), alura suondan las vias lateralas (658) e las autostradas (93). Sco fatg positiv poi vegnir constatà ch'il dumber da persunas che ha gì in accident sin ina via principala (-7 %) e sin ina via laterala (-16 %) è sa reducì, ed è creschì mo levamain sin autostradas (+11 %) e sin autovias (+3 %).