Il proxim glindesdi, ils 22 d'avust 2016, cumenza per ils uffants en il chantun Grischun il nov onn da scola e pia ina nova fasa da la vita. Blers d'els dumognan la via da scola u da scolina per l'emprima giada sulets. La polizia chantunala dal Grischun supplitgescha las manischunzas ed ils manischunzs d'esser spezialmain precauts envers quests uffants.

La campagna cuminaivla per la segirezza dal traffic "Sa fermar – laschar passar" dal post da consultaziun per la prevenziun d'accidents (bfu) e dal Touring Club Svizra (TCS) survegn il sustegn da la polizia chantunala dal Grischun. Ella supplitgescha las manischunzas ed ils manischunzs da sa fermar adina dal tuttafatg davant las strivlas melnas. Ils uffants vegnan instruids da la polizia chantunala dal Grischun da traversar la via pir, cur che las rodas na sa movan betg pli. Quai è necessari perquai ch'ils uffants na san anc betg stimar la sveltezza e la distanza dals vehichels.

Dapli preschientscha da la polizia il cumenzament da scola
Per segirar las vias da scola e per proteger nossas participantas e noss participants dal traffic ils pli giuvens, vegn la polizia a far dapli controllas da la sveltezza e da las vias da scola il cumenzament da scola. Qua vegn observà spezialmain il cumportament da las manischunzas e dals manischunzs cunzunt en vischinanza da las scolinas e da las chasas da scola e sche necessari, vegni agì. Parallelamain frequentan las instructuras ed ils instructurs da traffic da la polizia chantunala dal Grischun tut las scolinas e mussan als uffants, co ch'els ston sa cuntegnair per traversar la via.