Sonda, ils 5 da november 2016, han possessuras e possessurs d'armas per la terza giada la pussaivladad da dar giu gratuitamain armas e muniziun tar mintga post da polizia da la polizia chantunala dal Grischun. Tar l'ultima acziun da quest gener avant 3 onns èn vegnidas dadas giu var 162 armas e 150 kilograms muniziun.

La lescha d'armas revedida ch'è en vigur dapi il december 2008 oblighescha ils chantuns da prender encunter gratuitamain armas e muniziun da possess privat. Da princip èsi da tut temp pussaivel da dar giu armas e muniziun tar la polizia chantunala dal Grischun. Acziuns concentradas han però l'avantatg ch'ellas chaschunan dapli attenziun e ch'ellas han pia in effect pli grond. Perquai vegn organisada sonda, ils 5 da november 2016, per la terza giada in'acziun decentrala per dar giu armas. Tar tut ils posts da la polizia chantunala e tar tut las basas da la polizia da traffic sco er tar il commando da polizia a la Ringstrasse a Cuira pon vegnir dadas giu armas e muniziun tranter las 08.00 e las 12.00 sco er tranter las 13.30 e las 18.00.

Repetiziun mintga 3 onns
Possessuras e possessurs d'ina arma che dattan giu armas u muniziun, ston suttascriver al lieu ina decleranza da renunzia. Il post spezialisà per armas da la polizia chantunala dal Grischun rimna las armas e la muniziun dadas giu e dismetta tut en moda professiunala. A chaschun da la segunda acziun per dar giu armas l'onn 2013 èn vegnidas consegnadas 116 armas d'ordonanza, 17 pistolas e revolvers, 29 armas da chatscha e da sport, 17 armas da piz sco er 150 kilograms muniziun. Quella giada avevan var 110 burgaisas e burgais profità da l'acziun.