Dapi l'onn 2015 è la polizia chantunala dal Grischun participada al post da polizia virtual Suisse ePolice. Da nov pon ins cuntanscher il spurtegl online er sin apparats mobils sur in'app.  

Il post da polizia virtual è vegnì renovà dal tuttafatg. Suisse ePolice è vegnì actualisà tecnicamain e graficamain ed optimà per tut ils tips d'apparats. A partir d'immediat stat el a disposiziun sco app per iOS e per Android. Burgaisas e burgais pon avisar lur denunzia da tut temp da chasa davent u d'ordaifer ed han a disposiziun ils documents necessaris, sco p.ex. ils numers d'assicuranza.

Servetschs sin Suisse ePolice
Denunziads pon vegnir donns materials sco er enguladitschs da velos, da motos, d'apparats electronics, da skis e dad aissas. Annunziads pon er vegnir la perdita u l'enguladitsch dals numers d'immatriculaziun. Plinavant po vegnir emplenida e stampada la dumonda per ina permissiun d'acquistar armas. Betg sco ultim vegn inditgà – sur ina funcziun da tschertga – il proxim post da polizia.

Da tuttas uras e gratuitamain
Il post da polizia virtual è sa cumprovà e stat a disposiziun a la populaziun da tuttas uras sin www.suisse-epolice.ch. L'onn 2018 èn entradas passa 28 000 annunzias sur Suisse ePolice. Il diever da la plattafurma è gratuit e stat a disposiziun en trais linguas naziunalas. Gia 16 chantuns èn affiliads a Suisse ePolice e rendan accessibels ils servetschs dal spurtegl online a la populaziun.