Tar totalmain 2166 accidents da traffic èn mortas l'onn 2019 sin las vias grischunas 13 persunas, tantas sco l'onn precedent. 616 persunas èn vegnidas blessadas en accidents da traffic. En cumparegliaziun cun l'onn precedent è quai in augment da passa 4 pertschient. Quai resorta da la statistica actuala d'accidents da l'Uffizi federal da vias (UVIAS).
L'onn 2019 ha la polizia registrà totalmain 2166 accidents da traffic en il chantun Grischun. Quai correspunda pli u main a la media dals onns 2014 fin 2018 e dastga vegnir considerà sco positiv, sch'ins resguarda ch'il dumber da vehichels en il chantun Grischun è creschì er l'onn passà per circa 1400 vehichels a motor.
Dapli accidents cun donns da persunas, damain accidents cun donns materials
Il dumber d'accidents cun donns da persunas è creschì per 10,3 %, tar ils accidents cun donns materials hai dà ina reducziun (-5,6 %). Main allegraivel è il fatg ch'i n'ha dà naginas midadas dals dumbers da persunas grevamain blessadas (-1) e da persunas mortas cumpareglià cun l'onn precedent. En cumparegliaziun cun ils ultims 5 onns sa mussa puspè in augment dal dumber d'accidents da traffic che manischunzas e manischunzs da vehichels han chaschunà sut l'influenza d'alcohol. Sin las autostradas po vegnir registrada ina reducziun da 17 accidents (-19,6 %).
Dapli accidents mortals cun motos
Il dumber d'accidents cun motos è sa reducì levamain en cumparegliaziun il nivel da l'onn precedent. Main allegraivel è il fatg ch'igl ha dà in augment tar las persunas disgraziadas mortalmain (+2) ed er tar las persunas blessadas (+4). Tar ils dumbers d'accidents cun velos e tar ils dumbers da persunas blessadas en tals accidents sa mussa in cler augment. Percunter hai dà ina reducziun da 29 a 27 accidents tar ils e-bikes. Il dumber da persunas che manavan in e-bike e ch'èn vegnidas blessadas, n'è betg sa midà; percunter n'hai dà naginas blessuras mortalas. Tar ils accidents da pedunas e peduns e tar las persunas blessadas en tals accidents sa mussa in augment, ed igl ha stuì vegnir registrà in accident mortal.
Sveltezza memia auta e distracziun sco privels
225 accidents da traffic èn capitads pervia da sveltezza memia auta. Questa reducziun per 13,5 % mussa che l'activitad da controlla pli intensiva è sa cumprovada en quest sectur. Igl è in fatg che la distracziun en il traffic sin via è fitg derasada e ch'ella è in grond privel.
Durant l'onn da rapport hai dentant dà ina reducziun allegraivlamain gronda d'accidents da traffic pervia d'inattenziun u distracziun da las manischunzas e dals manischunzs.
La statistica detagliada dals accidents da traffic dal chantun Grischun po vegnir consultada en l'internet sut www.kapo.gr.ch/service/statistik
Infurmaziuns
Il scheff da la Polizia traffic da la Polizia chantunala dal Grischun, maior Robert Willi, stat a disposiziun mardi, ils 24 da mars 2020, da las 14.00 fin las 16.00, a las collavuraturas ed als collavuraturs da las medias per dumondas ed intervistas individualas. Coordinaziun dals termins sur e-mail info@kapo.gr.ch