Durant la fin d'emna ha la Polizia chantunala dal Grischun fatg controllas specificas da vehichels. Sut la maxima "STOP CORONA" ha ella controllà ed infurmà las participantas ed ils participants dal traffic. Las persunas controlladas han beneventà l'acziun da polizia ed han mussà chapientscha.
La sonda avantmezdi è vegnì prendì sut la marella spezialmain il traffic da viadi en direcziun sid. A Giuvaulta ha la Polizia chantunala dal Grischun manà vehichels sistematicamain giu da l'autovia A13 a la sortida. Ella ha surdà a las manischunzas ed als manischunzs in fegl sgulant "STOP CORONA" cun infurmaziuns davart las prescripziuns da l'Ordinaziun COVID-19 dal Cussegl federal. Las manischunzas ed ils manischunzs da rulottas e d'autos-rulotta èn vegnids infurmads ch'ils campadis èn serrads e ch'i n'è betg pussaivel da sortir da la Svizra. La finamira da l'acziun è stada quella da retegnair sin basa voluntara las participantas ed ils participants dal traffic da viagiar en il chantun Tessin u en l'Engiadina.
Acziun speziala sur Pasca
Las mesiras prendidas durant la fin d'emna vegnan cuntinuadas sur Pasca. Cun ina preschientscha pli gronda da la polizia en il spazi public, en spezial en hotspots sco plazzas da grillar, lais, plazzas da scola, staziuns e sin las axas da traffic, vegnan la Polizia chantunala dal Grischun e la Polizia da la citad da Cuira a controllar che l'Ordinaziun COVID-19 dal Cussegl federal vegnia observada. La polizia tschertga il dialog betg mo cun las possessuras ed ils possessurs d'abitaziuns secundaras e cun ils giasts dal di, mabain er cun las abitantas ed ils abitants dal Grischun. Las forzas d'acziun fan controllas e rendan attent a las ordinaziuns per proteger la populaziun. Persunas che na mussan betg chapientscha per quai, vegnan tut tenor il surpassament chastiadas u denunziadas.
Appel da corona a la populaziun
La Polizia chantunala dal Grischun e la Polizia da la citad da Cuira appelleschan a l'atgna responsabladad ed a l'atgna disciplina da tut las gruppas da vegliadetgna, d'observar las reglas da cumportament e las mesiras ordinadas. Da viadis nunnecessaris u d'excursiuns localas èsi da desister. Uschia duain vegnir evitadas er activitads da temp liber che chaschunan ina tscherta ristga, sco per exempel ir cun moto u far turas da skis. Gist ussa, ch'il sistem da sanadad è ordvart engrevgià, ha la prevenziun d'accidents da tut gener gronda prioritad.
