Per incumbensa da la Regenza ha la Polizia chantunala dal Grischun organisà da nov sia structura dals posts e dal persunal. Cun ina strategia ed organisaziun moderna e dinamica da las acziuns procura ella per ina gronda preschientscha da la polizia e pia per dapli segirezza e proximitad als burgais. Las collavuraturas ed ils collavuraturs profitan da plazzas da lavur modernas.

L'incumbensa sa basa sin il Program da la Regenza 2017 – 2020 e sin il rapport "Polizia dal Grischun 2015plus". Sin basa d'analisas èn incumbensas e prestaziuns vegnidas definidas  ed adattadas a las structuras ch'èn sa cumprovadas. Las regiuns Rain / Moesa, Surselva, Grischun central ed Engiadina vegnan rinforzadas tras quest ulteriur svilup; particularmain cun reducir las ierarchias ed ils plauns directivs sco er cun optimar las structuras ed ils process. La Polizia vegn ad ademplir sias incumbensas ed a tscherner la tecnica d'acziun en ils territoris d'acziun regiunals e surregiunals, e betg pli mo en ils territoris dals posts, ch'ins enconuscha oz.

Accent sin l'activitad da la polizia criminala
In'evaluaziun dals cas e dals dumbers da cas dals ultims 3 onns sco er ulteriuras analisas han mussà ch'i vegn pretendì d'augmentar las activitads e las prestaziuns en il sectur da la polizia criminala en l'entir chantun, e che quai vegn er fatg. Grazia a las capacitads ch'èn vegnidas libras en il sectur da la polizia da traffic (excorporaziun dals accumpagnaments da transports, diminuziun dals accidents da traffic, manaschi da dus centers da controlla per il traffic pesant) vegn engaschà dapli persunal per l'activitad da la polizia criminala en tut las regiuns. Las basas da la polizia criminala en las regiuns vegnan occupadas mintgamai cun 5 persunas. La retschertga da la polizia criminala a Cuira vegn rinforzada cun 6 persunas.

Strategia mobila da las acziuns
Ina infrastructura moderna dad IT sustegna la strategia mobila da las acziuns e pia la lavur en territoris d'acziun regiunals e surregiunals. Sin basa da las pussaivladads tecnicas pon las collavuraturas ed ils collavuraturs liquidar las lavurs administrativas en tut las immobiglias da la Polizia chantunala sco er directamain al lieu da l'eveniment; er quai procura per flexibilitad, per ina gronda preschientscha da la polizia e pia per segirezza e proximitad al burgais. La Polizia è cuntanschibla e po agir en moda flexibla.

Adattaziuns moderadas
Da l'organisaziun da grond spazi e da la lavur en territoris d'acziun resultan ina direcziun e cundiziuns da lavur modernas per las collavuraturas ed ils collavuraturs. Utilisond vinavant las immobiglias vegnan ils posts da polizia pli pitschens resumads ad unitads pli grondas areguard l'organisaziun e la direcziun. Quai vegn fatg en ils suandants territoris:

• Partenz (Schiers e Claustra): Center da polizia (CDP) Prättigau
• Planeiras/Alvra (Savognin, Casti, Lai): Center da polizia (CDP) Lenzerheide/Albula
• Val dal Rain (Domat e Tusaun): Center da polizia (CDP) Beverin
• Scanvetg (Arosa e Landquart): Center da polizia (CDP) Montalin

Uschia sa reducescha l'ierarchia dals schefs da las regiuns. L'activitad da direcziun inclusiv da scolaziun vegn rinforzada sin quest stgalim. Las basas da la polizia da traffic a Cuira ed a Tusaun vegnan ad interim laschadas talas e qualas pertutgant il lieu e la forza. L'onn 2024 vegnan ellas probablamain a pudair retrair – sin fundament d'in conclus da la Regenza – ina nova basa sper l'access da Cuira sid. Las immobiglias dals posts da polizia a Domat ed a Martina na vegnan betg pli duvradas en la nova organisaziun e vegnan serradas sin 31.12.2020. Il cumandant da la Polizia chantunala dal Grischun, colonel Walter Schlegel, s'exprima davart l'ulteriur svilup sco suonda: "Questas adattaziuns moderadas ed er modernas servan a la segirezza da la populaziun e dals giasts en noss chantun, optimeschan la direcziun ed il cumond da las acziuns e rinforzan la posiziun da la Polizia chantunala dal Grischun sco patruna attractiva."

Infurmaziuns
Ils 12 da zercladur 2020 da las 14.00 fin las 16.00 dat il cumandant da la Polizia chantunala dal Grischun, colonel Walter Schlegel, infurmaziuns en il rom da questa communicaziun. Termins ston vegnir fixads venderdi avantmezdi sut il numer da telefon 081 257 79 50.

Fegl d'infurmaziun Ulteriur svilup da l'organisaziun dal corp e structura dals posts