La Polizia chantunala dal Grischun dovra dronas dapi 1 onn. Ad in'orientaziun a las medias il mardi avantmezdi a Vaz Sut ha ella tratg in facit ed ha concedì ina invista da sia pratica. Collavuraturas e collavuraturs da las medias han pudì persequitar live, co ch'ina persuna sparida vegn tschertgada cun dronas.
La Polizia chantunala dal Grischun dovra dapi il 1. da zercladur 2019 dus tips da dronas. Tut tenor l'acziun vegni tschernì tranter dus differents models. Pilotadas vegnan las dronas d'appartegnents da la Gruppa da dronas che fa part da l'unitad speziala Servetsch da sgol da la polizia e che vegn manada en il sistem da milissa. Las dronas èn staziunadas en differents lieus en il chantun.
Recumandaziuns da la gruppa da lavur Dronas Svizra
La gruppa da lavur Dronas Svizra stat sut la direcziun dal cumandant da polizia grischun Walter Schlegel. En questa gruppa da lavur èn represchentads experts da las autoritads federalas sco per exempel da l'Uffizi federal d'aviatica civila UFAC, da l'Uffizi federal da communicaziun UFCOM, da l'Uffizi federal da polizia fedpol, da l'Uffizi federal da la duana e da la segirezza dals cunfins UDSC, da l'Uffizi federal da l'armament armasuisse, da l'Aviatica militara sco er da differents corps da polizia chantunals. L'onn 2017 ha la polizia redigì rapports cumplessivs davart il diever da dronas e davart la defensiun cunter dronas. Sa basond sin quests rapports ha il cumandant Schlegel dà l'incumbensa d'elavurar in concept per duvrar dronas, che regla il diever da las dronas tar la Polizia chantunala dal Grischun e ch'è vegnì deliberà da la direcziun da la polizia l'onn 2019. Envers las medias ha Schlegel declerà: "Las lavurs da basa da la gruppa da lavur Dronas Svizra vegnan adina messas a disposiziun als corps da polizia en furma da recumandaziuns, pervia dals svilups rasants currents. Uschia pon vegnir constituidas cooperaziuns tranter ils corps da polizia e vegnir fatgas sistematicamain las dretgas acquisiziuns necessarias."
D'acziuns da salvament fin a la documentaziun da crims
"Dronas duvrain nus per scenaris fitg differents", ha declerà Markus Eggenberger, schef da la Polizia da segirezza. Sco exempels ha el numnà acziuns da tschertga e da salvament, il far in maletg da la situaziun, la documentaziun d'accidents e d'eveniments da la polizia criminala, la segirada da cumprovas, il scleriment e l'exploraziun. Tenor Eggenberger ha il diever da dronas gronds avantatgs cumpareglià cun las metodas vertentas: "La drona è quieta, po sgular bass, ella explorescha la cuntrada sistematicamain e po er vegnir duvrada, sche la vista n'è betg buna. Plinavant vegn minimada ina periclitaziun pussaivla da las forzas d'acziun".
Transmissiun live da maletgs al post da commando
Ils maletgs da la tschertga da persunas tras dronas en il territori maltransibel da la champagna da Vaz Sut e dal Rain èn vegnids transmess live ed en ina auta qualitad al post da commando ed evaluads da Christian Nold, schef dal Servetsch da sgol da la polizia. Nold steva permanentamain en contact per func cun ils pilots da las dronas. La persuna sparida ha pudì vegnir localisada, las forzas d'acziun han pudì vegnir dirigidas al lieu e l'evacuaziun ha pudì vegnir organisada. Questa acziun ha mussà ils avantatgs dals maletgs live da la drona: Christian Nold en chaussa: "Tut tenor il territori d'acziun na ston las forzas da salvament betg sa render en privel e per exempel descender en ina chavorgia taissa."
